مجھ پہ بھی چشمِ کرم اے میرے آقا کرنا <br />حق تو میرا بھی ہے رحمت کا تقاضا کرنا <br /> <br />میں کہ ذرہ ہوں مجھے وسعتِ صحرا دےدے <br />کہ تیرے بس میں ہے قطرے کو بھی دریا کرنا <br /> <br />میں ہوں بےکس ترا شیوہ ہے سہارا دینا <br />میں ہوں بیمار ترا کام ہے اچھا کرنا <br /> <br />تُو کسی کو بھی اٹھاتا نہیں اپنے در سے <br />کہ تری شان کے شایاں نہیں ایسا کرنا <br /> <br />تیرے صدقے، وہ اُسی رنگ میں خود ہی ڈوبا <br />جس نے، جس رنگ میں چاہا مجھےرُسوا کرنا <br /> <br />یہ ترا کام ہے اے آمنہ کے دُرِّ یتیم <br />ساری امّت کی شفاعت، تنِ تنہا کرنا <br /> <br />کثرتِ شوق سے اوسان مدینے میں ہیں گم <br />نہیں کُھلتا کہ مجھے چاہیے کیا کیا کرنا <br /> <br />یہ تمنائے محبت ہے کہ اے داورِ حشر <br />فیصلہ میرا سپردِ شہہِ بطحا کرنا <br /> <br />آل و اصحاب کی سنت ، مرا معیارِ وفا <br />تری چاہت کے عوض ، جان کا سودا کرنا <br /> <br />شاملِ مقصدِ تخلیق یہ پہلو بھی رہا <br />بزمِ عالم کو سجا کر ترا چرچا کرنا <br /> <br />یہ صراحت ورفعنالک ذکرک میں ہے <br />تیری تعریف کرنا ،تجھے اونچا کرنا <br /> <br />تیرے آگے وہ ہر اک منظرِ فطرت کا ادب <br />چاند سورج کا وہ پہروں تجھے دیکھا کرنا <br /> <br />طبعِ اقدس کے مطابق وہ ہواؤں کا خرام <br />دھوپ میں دوڑ کے وہ ابر کا سایا کرنا <br /> <br />دشمن آجائے تو اٹھ کر وہ بچھانا چادر <br />حسنِ اخلاق سے غیروں کو وہ اپنا کرنا <br /> <br />کوئی فاروق سے پوچھے کہ کسے آتا ہے <br />دل کی دنیا کو نظر سے تہہ وبالا کرنا <br /> <br />اُن صحابہ کی خوش اطوار نگاہوں کو سلام <br />جن کا مسلک تھا طوافِ رخِ زیبا کرنا <br /> <br />مجھ پہ محشر میں نصیرؔ اُن کی نظر پڑ ہی گئی <br />کہنے والے اسے کہتے ہیں، خدا کا کرنا <br />کلام پیر نصیر الدین نصیر رح <br />MUJHPY BHI CHASHM E KARAM AE MERE AAQA KRNA , KALAAM PIR NASEER-UD-DIN NASEER(R.A( <br />دعا کا طالب شاہد محی الدین بخاری
