Lyrics : Faiz Ahmed Faiz <br /> <br />Aa, ke wabasta haiN us husn ki yaadeiN tujhse <br />Jis ne iss dil ko pari-khana bana rakha tha <br />Jis ki ulfat meiN bhula rakhi thi duniya humne <br />Deher ko deher ka afsana bana rakha tha <br /> <br />Aashna haiN tere qadmon se woh rahaiN jin par <br />Us kii madhosh jawani ne inayat ki hai <br />KarwaaN guzre haiN jin se usi raanaai kay <br />Jis ki inn aankhoN ne be-sood ibaadat ki hai <br /> <br />Tujhse kheli haiN woh mehboob hawaaiN jin mein <br />Uss kay malboos ki afsurda mehak baaqi hai <br />Tujh pay bhi barsa hai uss baam se mehtaab ka noor <br />Jis meiN beeti hui raatoN ki kasak baaqi hai <br /> <br />Tu nay dekhi haiN woh peshani woh rukhsaar woh honT <br />Zindagi jin kay tasavvur meiN luTa di humne <br />Tujh pay uTThi haiN woh khoii hui sahir aankheN <br />Tujhko maloom hai kyuN umr ganwadi humne <br /> <br />Hum pay mushtarkah haiN ehsaan gham-e-ulfat kay <br />Itnay ehsaan kay ginwaauN to ginwaa na sakuN <br />Hum nay iss ishq meiN kya khoya hai kya seekha hai <br />Juz teray aur ko samjhauN to samjha na sakuN <br /> <br />Aajizi seekhi, ghariboN ki himayat seekhi <br />Yaas o hirmaan kay dukh dard kay maani seekhay <br />Zeer dastoN kay masaaib ko samajhna seekha <br />Sard aahoN kay rukh e zard kay maani seekhay <br /> <br />Jab kahiN beTh kay rotay haiN woh bekas jin kay <br />Jin kay aankhoN meiN bilaktay huey so jaate haiN <br />NatawaanoN kay niwaloN pay jhapaTtay haiN uqaab <br />Bazoo tolay hue manDlaatay hue aate haiN <br /> <br />Jab kabhi bikta hai bazaar meiN mazdoor ka gosht <br />Shah rahoN pay ghareeboN ka luhoo behta hai <br />Aag si seenay meiN reh reh kay ubalti hai na pooch <br />Apnay dil par mujhe qaaboo hi nahiN rehta hai
