'A change o dells is lichtsome.' - Scots Proverb. <br /> <br />MY Grannie spent a merry youth, <br />She niver wantit for a joe, <br />An gin she telt me aye the truith, <br />Richt little was't she kent na o. <br />An whiles afore she gaed awa <br />To bed her doon below the gress, <br />Says she, 'Guidmen I've kistit twa, <br />But a change o deils is lichtsome, lass!' <br />Sae dinna think to maister me, <br />For Scotland's fou o brawlike chiels, <br />An aiblins ither folk ye'll see <br />Are fine an pleased to change their deils. <br />Aye, set yer bunnet on yer heid, <br />An cock it up upon yer bree, <br />O a' yer tricks ye'll hae some need <br />Afore ye get the best o me! <br />Sma' wark to fill yer place I'd hae, <br />I'll seek a sweethert i' the toon, <br />Or cast my hert across the Spey <br />An tak some pridefu Hieland loon. <br />I ken a man haes hoose an land, <br />His airm is stoot, his een are blue, <br />A ring o gowd is on his hand, <br />An he's a bonnier man nor you! <br />But hoose an gear an land an mair, <br />He'd gie them a' to get the preen <br />That preened the flouers in till my hair <br />Beside the mey-bush yestreen. <br />Jist tak you tent, an mind forby, <br />The braw guid sense my Grannie bad, <br />My Grannie's dochter's bairn am I, <br />An a change o deils is lichtsome, lad!<br /><br />Violet Jacob<br /><br />http://www.poemhunter.com/poem/a-change-o-deils/
