(TO A PIPE TUNE) <br /> <br />O, IT'S fine when the New an the Auld Year meet, <br />An the lads gang roarin i' the lichtit street, <br />An there's me an there's Alick an the miller's loon, <br />An Geordie that's the piper oot o Forfar toon. <br />Geordie Faa! Geordie Faa! <br />Up wi the chanter, lad, an gie's a blaw! <br />For we'll step to the tune while we've feet in till oor shuin, <br />Tho the bailies an the provost be to sort us a'! <br />We've three bonnie bottles, but the third ane's tuim, <br />Gin the road ran whisky, it's mysel wad soom! <br />But we'll stan' while we can, an be dancin while we mey, <br />For there's twa we hae to feenish, an it's Hogmanay. <br />Geordie Faa! Geordie Faa! <br />There's an auld carle glowerin oot ahint yon waa, <br />But we'll suin gar him lowp to the pipin till he cowp, <br />For we'll gie him juist a drappie, an he'll no say na! <br />My heid's dementit an my feet's the same, <br />When they'll no wark thegither it's a lang road hame; <br />An we've twa mile to traivel or it's mair like three, <br />But I've got a grip o Alick, an ye'd best grip me: <br />Geordie Faa! Geordie Faa! <br />The morn's near brakin an we'll need awa, <br />Gin ye're aye blawin strang, then we'll mibbie get alang, <br />An the deevil tak the laddie that's the first to fa'!<br /><br />Violet Jacob<br /><br />http://www.poemhunter.com/poem/hogmanay/
