Tasveer to thi kamil lekin, <br />Yeh rang na tha, <br />Yeh jan na thee, <br />Yeh shan na thee. <br />Yeh kiske lahu ne rang bhare, <br />Tasveer wohi shahkar bani, <br />Jo pheeki thi, <br />Berang bhi thi. <br />Yeh karb-o-bala men kaun aaya, <br />Keya shan hay is matwale ki, <br />Yeh jan hay ummat wale ki. <br />Is ret ke tapte maidan men, <br />Yeh rang anokhe laya hay. <br />Yeh Akbar hain, <br />Yeh Quasim hain, <br />Yeh Ibn-e-Hasan, <br />Yeh Asghar hain, <br />Yeh qous-o-qazah ke rang hain ya, <br />Phir noor ke rangeen dhare hain, <br />Yeh Ahmed ke ghar wale hain, <br />Quran ke natiq pare hain, <br />Nayab sahi, <br />Nadir bhi sahi, <br />Yeh rang bahut kamyab sahi, <br />Tasveer yun hi rah jaegi. <br />Koi pani lado thora sa, <br />Yeh rang bahut he peyase hain. <br />Asghar ko liye yeh kaun badha, <br />Woh teer chala, <br />Woh khoon ubla. <br />Kiskis ke lahoo se ishq ki is <br />Tasveer ko ranga jaye ga. <br />Quasim bhi gaye, <br />Akbar bhi gaye, <br />Asghar bhi gaye! <br />Ab koi nahin, <br />Ek hujjat hay, so rahne do. <br />Tasveer ke lekin qalb men yeh, <br />Berang sa kaisa halqa hay, <br />Dekho to zara keya likhkha hay, <br />Keya sibt-e-Nabi ka nam hay yeh! <br />Lo yeh bhi chale! <br />Ek shor utha, <br />Sijde men mujahid par kisne, <br />Yeh waar kiya, yeh waar kiya! <br />Tasveer hui rangeen teri, <br />Tayyar hui, <br />Shahkar bani, <br />Kamyab sahi, <br />Nadir bhi sahi, <br />Tasveer teri nayab sahi, <br />Fankar mere batla de zara, <br />Keya beete gi ab Zainab par!<br /><br />Akhtar Jawad<br /><br />http://www.poemhunter.com/poem/hussain-tasveer-e-ishq/
