'Death, whaur do ye bide, auld Death?' <br />'I bide in ilka breath,' <br />Quo' Death; <br />'No i' the pyramids, <br />No whaur the wormie rids <br />'Neth coffin-lids; <br />I bidena whaur life has been, <br />An' whaur's nae mair to be dune.' <br /> <br />'Death, whaur do ye bide, auld Death?' <br />'Wi' the leevin, to dee 'at are laith,' <br />Quo' Death; <br />'Wi' the man an' the wife <br />'At loo like life, <br />Bot strife; <br />Wi' the bairns 'at hing to their mither, <br />Wi' a' 'at loo ane anither.' <br /> <br />'Death, whaur do ye bide, auld Death?' <br />'Abune an' aboot an' aneth,' <br />Quo' Death; <br />'But o' a' the airts <br />An' o' a' the pairts, <br />In herts- <br />Whan the tane to the tither says, Na, <br />An' the north win' begins to blaw.'<br /><br />George MacDonald<br /><br />http://www.poemhunter.com/poem/the-home-of-death/
