NAZ EYLƏMİSƏN <br /> <br />Çoxlar incikdi ki, sən onlara naz eyləmisən, <br />Mən də incik ki, mənim nazımı az eyləmisən. <br /> <br />Etmisən bu nazı viranə könüldə sultan, <br />Evin abad ola - dərvişə niyaz eyləmisən. <br /> <br />Hər baxışda çalısan kipriyi mizrab kimi, <br />Bir qulaq ver, bu sınıq könlü nə saz eyləmisən. <br /> <br />Başdan aç yaylığı, əfşan elə susən-sünbül, <br />Sən bizim bayramımızsan, qışı yaz eyləmisən. <br /> <br />Kakili başda vurub eyləmisən tac kimi, <br />O qızıl teldən onu güllü qotaz eyləmisən. <br /> <br />Sən Gün ol, qoy qəmimiz dağda qar olsun, ərisin, <br />Mənim ancaq işimi suzü güdaz eyləmisən. <br /> <br />Sinə bir dəşti-Muğandır, quzu yan-yanə yatub, <br />Mənim ağlar gözümü orda Araz eyləmisən. <br /> <br />Xəttü xalından alıb məşqimi "Quran" yazaram, <br />Bu həqiqətdə məni əhli-məcaz eyləmisən. <br /> <br />Dəstəmaz eyiədiyin çeşmə müsəlman qanıdır, <br />Bilmirəm hansı kəlisada nəmaz eyləmisən. <br /> <br />Bu gözəllik ki, cahanda sənə vermiş tanrı, <br />Hər qədər naz eləsən eylə ki, az eyləmisən. <br /> <br />Mən "Əşiran" oxusam, pəncə "İraq" üstə gəzər, <br />Gözəlim, türk olalı tərki-"Hicaz" eyləmisən. <br /> <br />Mən bu mənada qəzəl yazmağa halım yox idi, <br />Sən mənimtək qocanı fırfirabaz eyləmisən. <br /> <br />Məni bu suz ilə atdın, aralandın, bilirəm, <br />Aranı bir para namərd ilə saz eyləmisən, <br /> <br />Ey dan ulduz, məni sən yaxşı tanırsan ki, <br />Səhər Üfüqü xəlvət edib razü niyaz eyləmisən. <br /> <br />Şəhriyar darda qalıb, dağda daşa daldalanıb, <br />Özün insaf elə, Məhmudi Ayaz eyləmisən. <br /> <br />_Ustad Şəhriyar/Shahriar_
