'O TELL me what was on yer road, ye roarin norlan' Wind, <br />As ye cam blawin frae the land that's niver frae my mind? <br />My feet they traivel England, but I'm deein for the north.' <br />'My man, I heard the siller tides rin up the Firth o Forth.' <br />'Aye, Wind, I ken them weel eneuch, an fine they fa' an rise, <br />An fain I'd feel the creepin mist on yonder shore that lies, <br />But tell me, or ye passed them by, what saw ye on the wey?' <br />'My man, I rocked the rovin gulls that sail abuin the Tay.' <br />'But saw ye naething, leein Wind, afore ye cam to Fife? <br />There's muckle lyin 'yont the Tay that's mair to me nor life.' <br />'My man, I swept the Angus braes ye hinna trod for years.' <br />'O Wind, forgie a hameless loon that canna see for tears!' <br />'An far abuin the Angus straths I saw the wild geese flee, <br />A lang, lang skein o beatin wings, wi their heids towards the sea, <br />An aye their cryin voices trailed ahint them on the air.-' <br />'O Wind, hae maircy, haud yer whisht, for I daurna listen mair!'<br /><br />Violet Jacob<br /><br />http://www.poemhunter.com/poem/the-wild-geese-3/
