Oko kwabakho wena kulizulu lezijwili, <br />Bukho Bakho Obo! <br />Oko saxhalaba ngaphakathi luxhwaleko, <br />Bukho Bakho Nabo! <br />Kanti ulundwendwe olutheni olungade luhambe? <br />Ulihashe lini elinganxanwa noxa lidiniwe? <br />kukakade unxanelwe thina, <br />Xolela mhlonitsha umyalezo siwufumene, <br /> <br />Ngqondo zethu zingqulequ ezikrunekileyo, <br />Mehlo ethu adumbile ziinyembezi, <br />Ntliziyo zixhwalekile, <br />Inene sanele ngoku! <br />Kwazimpondo zankomo kugqunyelelw'imizimba, <br />Kwakukuwa kweenkukhu iphumile imiphefumlo, <br />Koze kube nini na sicand'olu dada? <br />Kwakudala ngoko, <br />apho sasingqawa sifuna uncedo macala, <br />Sithini ke ngoku kuba sanele? <br /> <br />Yini ungathathi konke ushiye esibathandayo, <br />Ncwaso luni lona olu lwakho? <br />Nanga amasimi sikunikezile, <br />Naz'impahla kuquka iinkomo sikujulele, <br />Kodwa wena uthatha esibathandayo, <br /> <br />sitsho sanyeke-nyeke ziintlungu, <br />zingqongqo iingcamango bubunzulu beenkumbulo <br />Siwuvule gengelele umlomo kuba usahlule, <br />kuwe zalima zibhenel'etyeni utshabalalisa, <br />Ugxabha-gxabhisa nje ufuna ntoni? <br />Umhunyha-mhunyha iintsana zethu nje, <br />Wena uzalwa nguban? <br />Uxolo!<br /><br />Anele TheAfrikanSon kaMthethungqongqo Potelwa<br /><br />http://www.poemhunter.com/poem/seso-sichithamzi-ugawulayo/
