1 My heart is a-breaking, dear Tittie, <br />2 Some counsel unto me come len'; <br />3 To anger them a' is a pity, <br />4 But what will I do wi' Tam Glen? <br /> <br />5 I'm thinking, wi' sic a braw fellow, <br />6 In poortith I might mak a fen': <br />7 What care I in riches to wallow, <br />8 If I mauna marry Tam Glen? <br /> <br />9 There's Lowrie, the laird o' Dumeller, <br />10 "Guid-day to you,"--brute! he comes ben: <br />11 He brags and he blaws o' his siller, <br />12 But when will he dance like Tam Glen? <br /> <br />13 My minnie does constantly deave me, <br />14 And bids me beware o' young men; <br />15 They flatter, she says, to deceive me; <br />16 But wha can think sae o' Tam Glen? <br /> <br />17 My daddie says, gin I'll forsake him, <br />18 He'll gie me guid hunder marks ten: <br />19 But, if it's ordain'd I maun take him, <br />20 O wha will I get but Tam Glen? <br /> <br />21 Yestreen at the valentines' dealing, <br />22 My heart to my mou gied a sten: <br />23 For thrice I drew ane without failing, <br />24 And thrice it was written, "Tam Glen"! <br /> <br />25 The last Halloween I was waukin <br />26 My droukit sark-sleeve, as ye ken: <br />27 His likeness cam up the house staukin, <br />28 And the very gray breeks o' Tam Glen! <br /> <br />29 Come counsel, dear Tittie, don't tarry; <br />30 I'll gie ye my bonie black hen, <br />31 Gif ye will advise me to marry <br />32 The lad I lo'e dearly, Tam Glen.<br /><br />Robert Burns<br /><br />http://www.poemhunter.com/poem/tam-glen/
