Daw gilimot, nawala, ug nahikalimtan mo na sa dayon <br />Ang himno ug awit sa atong damgo nga gi hiklib ko karon <br />Kay ang mga tipasi sa kagahapon daw kini haghagonon <br />Nga nagahaploy sa akong kalawasan tim-os nga handomon <br />Sa matag hapon, ania ako, kanonay nagahandoraw <br />Sa mga bito-on matag subang sa bulan sa kagabhi-on <br /> <br />Lab-as pa sa akong panumdoman kong akong batbaton <br />Ang imong mga panaad nga gi hapnig ko lang sa hilom <br />Kini ang gahatag ug hagit nga ako ni-a magapadayon <br />Sa pagdumdom, sa mga panaad tang buhi ug bahandianon <br />Nga budhian ta sa atong kinabuhi kong kinahanglanon <br />Kanako pabilo nga ning subang gabuhi kanako sa dayon <br /> <br />Ug kay ngano, unsa; tugutan ta ba sila nga bulagon kita? <br />Ang akong pagka ulipon ug pagkatimawa kasal-anan ba? <br />Sa mata sa diyos patas kitang tanan, walay labaw o bathala <br />Pero kay gikatakda ka sa usa nga kanila may importansiya <br />Kay sila na silaw sa salapi nga gihambin nga ilang gibandira <br />Ania, panahon sa subang sa bulan, gitakda inyong panaghiosa <br /> <br />Paminawa, bati-a ang pagdangoyngoy sa akong kasingkasing <br />Sa kamingaw pabiling gaantos daw gipangilaba sa hangin <br />Hain na, o asa na, ug na unsa na ang gipanompa-an tang duha <br />Pabilin kong gi balaan sa hilom ang langitnon tang gugma <br />Ug sa akong kahingawa, o ngano ba, nganong galo-ib ka? <br />Sa pagsubang sa bulan, ning akong lubnganan, ako pasaylo-a.<br /><br />Edgar Rendon Eslit<br /><br />http://www.poemhunter.com/poem/sa-pagsubang/
