SINING SA HALIP / KAPALIT NG DASAL <br /> <br /> <br /> <br />Minamatyagan kahit hungkag maaliwalas na dalumat. <br /> <br />Natunghayan habang nag-aabang naghihintay. <br /> <br />Subalit ngayon sino ang tutuklas sino ang nasawi’t sino ang pumaslang? <br /> <br />Ama, ina, anak: dalaga, ina, balo—tatlong panauhang kapwa sumusukat sa puwang na nasa pagitan ng kidlat at humaliling katahimikan. <br /> <br />Adyahan ang supling habang may dambuhalang along umaalsa’t umaakyat. <br /> <br />Asin sa bulaklak hitik ng tinik ngunit anong bango’t nakalalango. <br /> <br />Pinagtaksilan. Bungtong-hininga mula sa naputol na tadyang sa puntod ng lupa. <br /> <br />Agam-agam. Inaasam-asam sa bawat tuka ng tadhana. <br /> <br />Minasaker sinalvage ang pusakal pagdating sa dulo. <br /> <br />Pinutol sa lalamunan ang talulot sa gilid ng isla at kabibeng inulila. <br /> <br />Kay bangis ng tanghaling bilang naglambong sa dalampasigan. <br /> <br />Bigkasin ang hilahil bigkasin ang linggatong lapastangan. <br /> <br />Bumugso ang busilak na buntala sa iyong balintataw. <br /> <br />Baliw man ang bungtong-hininga sa pagpanaw ng liwanag. <br /> <br />Sa makulimlim na panganorin may bulong sa pagaspas ng talahib. <br /> <br />May alagang kulasisi lumipad sa alapaap ng kalooban. <br /> <br />Nagbabakasakli sa alulod na kaluluwang inabot ng alat. <br /> <br />Maalikabok man ang lagusan pinapatakan din ng alimuom.<br /><br />Sonny San Juan, Jr.<br /><br />http://www.poemhunter.com/poem/tagalog-elegy-sining-sa-halip-na-dasal/
