OH, I wad like to ken—to the beggar-wife says I— <br />Why chops are guid to brander and nane sae guid to fry. <br />An’ siller, that ’s sae braw to keep, is brawer still to gi’e. <br />It ’s gey an’ easy spierin’, says the beggar-wife to me. <br /> <br />Oh, I wad like to ken—to the beggar-wife says I— <br />Hoo a’things come to be whaur we find them when we try, <br />The lasses in their claes an’ the fishes in the sea. <br />It ’s gey an’ easy spierin’, says the beggar-wife to me. <br /> <br />Oh, I wad like to ken—to the beggar-wife says I— <br />Why lads are a’ to sell an’lasses a’ to buy; <br />An’ naebody for dacency but barely twa or three. <br />It ’s gey an’ easy spierin’, says the beggar-wife to me. <br /> <br />Oh, I wad like to ken—to the beggar-wife says I— <br />Gin death’s as shure to men as killin’ is to kye, <br />Why God has filled the yearth sae fu’ o’ tasty things to pree. <br />It ’s gey an’ easy spierin’, says the beggar-wife to me. <br /> <br />Oh, I wad like to ken—to the beggar-wife says I— <br />The reason o’ the cause an’ the wherefore o’ the why, <br />Wi’ mony anither riddle brings the tear into my e’e. <br />It ’s gey an’ easy spierin’, says the beggar-wife to me.<br /><br />Robert Louis Stevenson<br /><br />http://www.poemhunter.com/poem/the-spaewife/
