Daar sou ek vrede weer besef <br />Waar Tebes in die stil woestyn <br />Sy magtig' rotswerk hoog verhef <br />En Mara in die sand verdwyn; <br /> <br />Waar smôrens van die hoogste krans <br />Die berghaan draaiend opwaarts spoed <br />Om uit die gloeiend' hemeltrans <br />Met groot geroep die son te groet; <br /> <br />Waar treurig nog die wolfgehuil <br />Weerklankend in die klowe dwaal, <br />En grootwild om die syferkuil <br />Soos skadu's in 'n stofwolk maal; <br /> <br />En huiswaarts brommend sluip die tier, <br />Sy donker moordplek pas verlaat, <br />Wanneer die eerste grou lumier <br />Met slepend' mis die veld beslaat. <br /> <br />O Land van al ons liefde, daar <br />Sou ek aanbiddend weer <br />Die kloppe van U hart gewaar, <br />U moederlike skoonheid eer. <br /> <br />Sou ek een guns nog hier verdien, <br />- Nog een gebed omhoog verhoord - <br />Geen mensepraal sou ek wou sien, <br />Die glorie van geen vreemde oord. <br />My bede sou net dit verkry: - <br />Laat weer U eensaamheid my daar <br />Vir laas met roerend' mag berei <br />U groter stilte te aanvaar. <br /> <br />Laat uitlok deur geen suil of steen <br />'n Enkel sug of woord van haat; <br />Met al U vrede om my heen <br />Sal nagt'liks uit die hemelstraat <br />Sag neerskyn op my laaste huis <br />Die vonkelend' sterrebeeld van U kruis. <br /> <br />Elk' ydel vrees sal daar verdwyn; <br />Daar sou ek vrede weer besef <br />Waar Tebes in die stil woestyn <br />Sy magtig' rotswerk hoog verhef.<br /><br />Eugene Marais<br /><br />http://www.poemhunter.com/poem/waar-tebes-in-die-stil-woestyn/
