تجھ میں اور مجھ میں وہ اب رازو نیاز آئے کہاں؟ <br />اب میسر دھوپ میں ہیں زلف کے سائے کہاں؟ <br />جانے والے سوچ کر جانا کہ بے حد شوخ ہے <br />کیا پتہ ہے ایسے دل کا کس پہ آ جائے کہاں؟ <br />تیرے میرے گھر میں جو دیوار حائل ہوگئی <br />تیشۂ پُرزور کو مشکل ہے کہ ڈھائے کہاں؟ <br />تم انا کے پاسباں تھے، ہم بھی غیرت کے امیں <br />تم جو سُن پائے نہیں تو، ہم بھی کہہ پائے کہاں؟ <br />تیرے پہلو سے جو ہجرت کر کے آیا تھا وہی <br />بے اماں، بے فیض، بے توقیر دل جائے کہاں؟ <br />مے کدے سے بے اثر نکلے تو اُس کے گھر گئے <br />ہم کہاں سے پی کے آئے اور چکرائے کہاں؟ <br />اُس کے گھر ہم چائے پہ مدعو تھے، سب اچھا رہا <br />واپسی پر یاد آیا، رہ گئی چائے کہاں؟ <br />عامر امیرؔ <br /> <br />محبت برملا ہے یہ اشاروں سے نہیں ہوتی <br />سمندر کیا ہے ؟ آگاہی کناروں سے نہیں ہوتی <br />مری قسمت ہے میرے ہاتھ میں، ہے کون جو بدلے؟ <br />کہ یہ جرات تو خود میرے ستاروں سے نہیں ہوتی <br />کسی اُمت کسی ملت کی اونچائی حقیقت میں <br />معیاروں سے تو ہوتی ہے مِناروں سے نہیں ہوتی <br />مجھے اپنے پیاروں سے کوئی شکوہ نہیں کیونکہ <br />مجھے کوئی توقع اپنے پیاروں سے نہیں ہوتی <br />نباہے دیر تک جو دشمنی وہ سامنے آئے <br />ہماری دشمنی بے اعتباروں سے نہیں ہوتی <br />محبت کی، نباہی، اور دشمن کو عطا کر دی <br />وہ ہم نے بات کی جو آپ ساروں سے نہیں ہوتی <br />عامر امیرؔ
