نکل چکے ہیں خرد کی حدوں سے دیوانے-قوالی گولڑہ شریف <br /> <br />نکل گئے ہیں خرد کی حدوں سے دیوانے <br />اب اہلِ ہوش سے کہہ دو نہ آئیں سمجھانے <br /> <br />بساطِ بزم الٹ کر کہاں گیا ساقی <br />فضا خموش ، سُبُو چپ ، اداس پیمانے <br /> <br />یہ کس کے غم نے دلوں کا قرار لُوٹ لیا <br />یہ کس کی یاد میں سر پھوڑتے ہیں دیوانے <br /> <br />بھری بہار کا منظر ابھی نگاہ میں تھا <br />مری نگاہ کو کیا ہوگیا خدا جانے <br /> <br />ہے کون بر لبِ ساحل ، کہ پیشوائی کو <br />قدم اُٹھائے بہ اندازِ موج ، دریا ، نے <br /> <br />تمام شہر میں اک درد آشنا نہ ملا <br />بسائے اِس لئے اہلِ جنوں نے ویرانے <br /> <br />نہ اب وہ جلوہ یوسف نہ مصر کا بازار <br />نہ اب وہ حسن کے تیور ، نہ اب وہ دیوانے <br /> <br />نہ حرفِ حق ، نہ وہ منصور کی زباں ، نہ وہ دار <br />نہ کربلا ، نہ وہ کٹتے سروں کے نذرانے <br /> <br />نہ بایزید ، نہ شبلی ، نہ اب جنید کوئی <br />نہ اب و سوز ، نہ آہیں ، نہ ہاؤ ھُو خانے <br /> <br />خیال و خواب کی صورت بکھر گیا ماضی <br />نہ سلسلے نہ وہ قصے نہ اب وہ افسانے <br /> <br />نہ قدر داں ، نہ کوئی ہم زباں ، نہ انساں دوست <br />فضائے شہر سے بہتر ہیں اب تو ویرانے <br /> <br />بدل گئے ہیں تقاضے مزاجِ وقت کے ساتھ <br />نہ وہ شراب ، نہ ساقی ، نہ اب وہ میخانے <br /> <br />تمام بند جُنوں توڑ بھی گیا ، لیکن <br />انا کے جال میں جکڑے ہوئے ہیں فرزانے <br /> <br />یہ انقلاب کہاں آسماں نے دیکھا تھا <br />الجھ رہے ہیں غمِ زندگی سے دیوانے <br /> <br />ہر ایک اپنے ہی سود و زیاں کی فکر میں ہے <br />کوئی تو ہو ، جو مرے دل کا درد پہچانے <br /> <br />ترا وجود غنیمت ہے پھر بھی اے ساقی! <br />کہ ہوگئے ہیں پھر آباد آج میخانے <br /> <br />وہی ہجوم ، وہی رونقیں ، وہی میکش <br />وہی نشہ ، وہی مستی ، وہی طرب خانے <br /> <br />جبیں کو در پہ ترے رکھ دیا یہی کہہ کر <br />یہ جانے اور ترا سنگِ آستاں جانے <br /> <br />اُٹھیں گے پی کے تری مے نواز آنکھوں سے <br />یہ طے کئے ہوئے بیٹھے ہیں آج دیوانے <br /> <br />ہے تیری ذات وہ اک شمعِ انجمن افروز <br />کہ جس کی لو پہ لپکتے رہیں گے پروانے <br /> <br />کوئی نشاط کا ساماں کوئی طرب کی سبیل <br />لگی ہے پھر سرِ میخانہ بدلیاں چھانے <br /> <br />تو بولتا ہے تو چلتی ہے نبضِ میخانہ <br />تو دیکھتا ہے تو کرتے ہیں رقص پروانے <br /> <br />یہ مستیاں نہیں جام و سُبو کے حصے میں <br />تیری نگاہ سے پیتے ہیں تیرے دیوانے <br /> <br />نصیر ! اشک تو پلکوں پہ سب نے دیکھ لیے <br />گزر رہی ہے جو دل پر ، وہ کوئی کیا جانے <br />کلام حضرت الشیخ پیر سید نصیر الدین نصیر جیلانی رحمتہ اللہ تعالی علیہ گولڑہ شریف <br /> <br />.اپ کی دعاؤں کاطالب سید شاہد محی الدین بخاری
