ہم رات بہت روئے، بہت آہ و فغاں کی <br />دل درد سے بوجھل ہو تو پھر نیند کہاں کی <br /> <br />سر زانو پہ رکھے ہوئے کیا سوچ رہی ہو؟ <br />کچھ بات سمجھتی ہو محبت زدگاں کی؟ <br /> <br />تم میری طرف دیکھ کے چپ ہو سی گئی تھیں <br />وہ ساعتِ خوش وقت نشاطِ گزراں کی <br /> <br />اک دن یہ سمجھتے تھے کہ پایانِ تمنا <br />اک رات ہے مہتاب کے ایامِ جواں کی <br /> <br />اب اور ہی اوقات ہے اے جانِ تمنا! <br />ہم نالہ کناں، بے گنَہاں، غم زدگاں کی <br /> <br />اس گھر کی کھلی چھت پہ چمکتے ہوئے تارو <br />کہتے ہو کبھی جا کے وہاں بات یہاں کی ؟ <br /> <br />برگشتہ ہوا ہم سے، یہ مہتاب تو پیارو! <br />بس بات سنی، راہ چلا، کاہکشاں کی <br /> <br />اللہ کرے میرؔ کا جنت میں مکاں ہو <br />مرحوم نے ہر بات ہماری ہی بیاں کی <br /> <br />ہوتا ہے یہی عشق میں انجام سبھی کا <br />باتیں یہی دیکھی ہیں محبت زدگاں کی <br /> <br />پڑھتے ہیں شب و روز اسی شخص کی غزلیں <br />غزلیں یہ حکایات ہیں ہم دل زدگاں کی <br /> <br />تم چرخِ چہارم کے ستارے ہوئے لوگو! <br />تاراج کرو زندگیاں اہلِ جہاں کی <br /> <br />اچھا ہمیں بنتے ہوئے، مٹتے ہوئے دیکھو <br />ہم موجِ گریزاں ہی سہی، آبِ رواں کی <br /> <br />انشاؔ سے ملو، اس سے نہ روکیں گے وہ، لیکن <br />اُس سے یہ ملاقات نکالی ہے کہاں کی <br /> <br />مشہور ہے ہر بزم میں اس شخص کا سودا <br />باتیں ہیں بہت شہر میں بدنام، میاں کی <br /> <br />اے دوستو! اے دوستو! اے درد نصیبو <br />گلیوں میں، چلو سیر کریں، شہرِ بتاں کی <br /> <br />ہم جائیں کسی سَمت، کسی چوک میں ٹھہریں <br />کہیو نہ کوئی بات کسی سود و زیاں کی <br /> <br />انشاؔ کی غزل سن لو، پہ رنجور نہ ہونا <br />دیوانا ہے، دیوانے نے اک بات بیاں کی <br /> <br />ابن انشاء
