ابھی تو میں جوان ہوں - حفیظ جالندھری

ابھی تو میں جوان ہوں <br /> <br />ہوا بھی خوش گوار ہے <br />گلوں پہ بھی نکھار ہے <br />ترنّمِ ہزار ہے <br />بہارِ پُر بہار ہے <br />کہاں چلا ہے ساقیا <br />اِدھر تو لوٹ، اِدھر تو آ <br />یہ مجھ کو دیکھتا ہے کیا <br />اٹھا سبُو، سبُو اٹھا <br />سبُو اٹھا، پیالہ بھر <br />پیالہ بھر کے دے اِدھر <br />چمن کی سمت کر نظر <br />سماں تو دیکھ بے خبر <br />وہ کالی کالی بدلیاں <br />افق پہ ہو گئیں عیاں <br />وہ اک ہجومِ مے کشاں <br />ہے سوئے مے کدہ رواں <br />یہ کیا گماں ہے بد گماں <br />سمجھ نہ مجھ کو ناتواں <br /> <br />خیالِ زہد ابھی کہاں <br />ابھی تو میں جوان ہوں <br /> <br />عبادتوں کا ذکر ہے <br />نجات کی بھی فکر ہے <br />جنون ہے ثواب کا <br />خیال ہے عذاب کا <br />مگر سنو تو شیخ جی <br />عجیب شے ہیں آپ بھی <br />بھلا شباب و عاشقی <br />الگ ہوئے بھی ہیں کبھی <br />حسین جلوہ ریز ہوں <br />ادائیں فتنہ خیز ہوں <br />ہوائیں عطر بیز ہوں <br />تو شوق کیوں نہ تیز ہوں <br />نگار ہائے فتنہ گر <br />کوئی اِدھر کوئی اُدھر <br />ابھارتے ہوں عیش پر <br />تو کیا کرے کوئی بشر <br />چلو جی قصّہ مختصر <br />تمھارا نقطۂ نظر <br /> <br />درست ہے تو ہو مگر <br />ابھی تو میں جوان ہوں <br /> <br />نہ غم کشود و بست کا <br />بلند کا نہ پست کا <br />نہ بود کا نہ ہست کا <br />نہ وعدۂ الست کا <br />امید اور یاس گم <br />حواس گم، قیاس گم <br />نظر کے آس پاس گم <br />ہمہ بجز گلاس گم <br />نہ مے میں کچھ کمی رہے <br />قدح سے ہمدمی رہے <br />نشست یہ جمی رہے <br />یہی ہما ہمی رہے <br />وہ راگ چھیڑ مطربا <br />طرَب فزا، الَم رُبا <br />اثر صدائے ساز کا <br />جگر میں آگ دے لگا <br />ہر ایک لب پہ ہو صدا <br />نہ ہاتھ روک ساقیا <br /> <br />پلائے جا پلائے جا <br />ابھی تو میں جوان ہوں <br /> <br />یہ گشت کوہسار کی <br />یہ سیر جوئبار کی <br />یہ بلبلوں کے چہچہے <br />یہ گل رخوں کے قہقہے <br />کسی سے میل ہو گیا <br />تو رنج و فکر کھو گیا <br />کبھی جو بخت سو گیا <br />یہ ہنس گیا وہ رو گیا <br />یہ عشق کی کہانیاں <br />یہ رس بھری جوانیاں <br />اِدھر سے مہربانیاں <br />اُدھر سے لن ترانیاں <br />یہ آسمان یہ زمیں <br />نظارہ ہائے دل نشیں <br />انھیں حیات آفریں <br />بھلا میں چھوڑ دوں یہیں <br />ہے موت اس قدر قریں <br />مجھے نہ آئے گا یقیں <br /> <br />نہیں نہیں ابھی نہیں <br />ابھی تو میں جوان ہوں