Me të mbërritur në Kosovë, pas përurimit të Klinikës Gjinekologjike në Pasjan, kryeministri serb Aleksandër Vuçiç shfrytëzoi fjalimin e tij para qytetarëve të mbledhur për të bërë deklarata nacionaliste, duke përmendur edhe frazën e ngahershme se ‘Kosova është djep i Serbisë’. <br /> <br />“Kosova është djep i Serbisë dhe ne nuk do ta harrojmë kurrë, pasi kemi fëmijët tanë të lindur këtu. Ne si qeveri e Serbisë do të angazhohemi vazhdimisht që të krijojmë sa më shumë vende pune për të rritur mirqenien e serbëve. Ne synojmë të hapim zyrën tonë këtu në Grançanicë dhe Mitrovicë”, iu tha Vuçiç serbve duke theksuar se ata duhet të kenë marrëdhënie të mirë me ‘fqinjët shqiptarë’. <br /> <br />Drejtuar serbëve, ai tha se nuk duhet ta shesin pasurinë e tyre, që sipas tij shitja është shpërngulja e serbëve. <br /> <br />Vuçiç mbylli fjalimin e tij me fjalët “Rroftë Serbia”. Kjo është vizita e parë e një kryeministri serb që nga viti 1999. Më herët, të rinj kosovarë organizuan një protestë paqësore me pankarta ku i kërkonin Vuçiç të japë llogari për krimet e luftës në Kosovë. Një ditë më parë, në Mitrovicë janë grisur një nga billbordet e vendosura për t’i shprehur mirëseardhjen Vuçiç.
