Suna hai log usay aankh bhar ke dekhte hain <br />So us ke shahar main kuchh din thehr ke dekhte hain <br />Suna hai rabt hai us ko kharab halon se <br />So apne aap ko barbad kar ke dekhte hain <br />Suna hai dard ki gahak hain chashm-e nazuk us ki <br />So ham bhi us ki gali se guzar ke dekhte hain <br />Suna hai us ko bhi hai sher-o shayari se shagaf <br />So ham bhi mojazay apnay hunar ke dekhte hain <br />Suna hai bole to baton se phool jharrtay hain <br />Ye baat hai to chalo baat kar ke dekhte hain <br />Suna hai raat use chand takta rehta hai <br />Sitaray baam-e falak se utar kar dekhtay hain <br />Suna hai hashr hain us ki ghazaal si aankhain <br />Suna hai us ko hiran dasht bhar ke dekhte hain <br />Suna hai din ko usay titliyan satati hain <br />Suna hai raat ko jugno thahar ke dekhte hain <br />Suna hai rat se barh kar hain kakulan us ki <br />Suna hai sham ko saye guzar ke dekhte hain <br />Suna hai us ki siyah chashmagi qiyamat hai <br />So us ko surma farosh aankh bhar ke dekhte hain <br />Suna hai us ke labon se gulab jalate hain <br />So ham bahar par ilzaam dhar ke dekhte hain <br />Suna hai aaina tamasal hai jabin us ka <br />Jo sada dill hain ban sanvar ke dekhte hain <br />Suna hai jab se hamail hain us ki gardan main <br />Mizaj aur hi lal-o gauhar ke dekhte hain <br />Suna hai chashm-e tasavur se dasht-e imkan main <br />Palang zawaiya us ki kamar ke dekhte hain <br />Suna hai us ke badan ke tarash aisay hain <br />Ke phuul apani qabayain qatar ke dekhte hain <br />Woh sarvqad hai magar begul-e muraad nahin <br />Ke us shajar pe shagufay samar ke dekhte hain <br />Bas ek nigah se lutata hai qafila dil ka <br />So rahravaan-e tamannaa bhi dar ke dekhte hain <br />Suna hai us ke shabistan se mutasil hai behisht <br />Makin udhar ke bhi jalway idhar ke dekhte hain <br />Rukay tu gardishain us ka tawaf karti hain <br />Chalay to us ko zamanay theher ke dekhte hain <br />Kisay naseeb ke be parahan usay dekhay <br />Kabhi kabhi dar-o divaar ghar ke dekhte hain <br />Kahaniyan hi sahi sab mubalaghay hi sahi <br />Agar woh khawb hai tabeer kar ke dekhte hain <br />Ab us ke sheher main thehrain ke kooch kar jayan <br />Faraz aao sitaray safar ke dekhte hain
