اے عشق ہمیں برباد نہ کر <br /> <br />اے عشق نہ چھیڑ آ آ کے ہمیں، ہم بھولے ہوؤں کو یاد نہ کر <br />پہلے ہی بہت ناشاد ہیں ہم ، تو اور ہمیں ناشاد نہ کر <br />قسمت کا ستم ہی کم نہیں کچھ ، یہ تازہ ستم ایجاد نہ کر <br />یوں ظلم نہ کر، بیداد نہ کر <br />اے عشق ہمیں برباد نہ کر <br /> <br />جس دن سے ملے ہیں دونوں کا، سب چین گیا، آرام گیا <br />چہروں سے بہارِ صبح گئی، آنکھوں سے فروغِ شام گیا <br />ہاتھوں سے خوشی کا جام چھٹا، ہونٹوں سے ہنسی کا نام گیا <br />غمگیں نہ بنا، ناشاد نہ کر <br />اے عشق ہمیں برباد نہ کر <br /> <br />ہم راتوں کو اُٹھ کر روتے ہیں، رو رو کے دعائیں کر تے ہیں <br />آنکھوں میں تصور، دل میں خلش، سر دُھنتے ہیں آہیں بھرتےہیں <br />اے عشق! یہ کیسا روگ لگا، جیتے ہیں نہ ظالم مرتے ہیں <br />یہ ظلم تو اے جلّاد نہ کر ! <br />اے عشق ہمیں برباد نہ کر <br /> <br />یہ روگ لگا ہے جب سے ہمیں، رنجیدہ ہوں میں بیمار ہے وہ <br />ہر وقت تپش، ہر وقت خلش ،بے خواب ہوں میں،بیدار ہے وہ <br />جینے سے ادھر بیزار ہوں میں، مرنے پہ اُدھر تیار ہے وہ <br />اور ضبط کہے فریاد نہ کر <br />اے عشق ہمیں برباد نہ کر <br /> <br />جس دن سے بندھا ہے دھیان ترا، گھبرائےہوئے سے رہتے ہیں <br />ہر وقت تصور کر کر کے شرمائے ہوئے سے رہتے ہیں <br />کملائے ہوئے پھولوں کی طرح کملائے ہوئے سے رہتے ہیں <br />پامال نہ کر، برباد نہ کر <br />اے عشق ہمیں برباد نہ کر <br /> <br />بیددر! ذرا انصاف تو کر! اس عمر میں اور مغموم ہے وہ <br />پھولوں کی طرح نازک ہے ابھی ، تاروں کی طرح معصوم ہے وہ <br />یہ حسن ، ستم! یہ رنج، غضب! مجبور ہوں میں! مظلوم ہے وہ <br />مظلوم پہ یوں بیداد نہ کر <br />اے عشق ہمیں برباد نہ کر <br /> <br />اے عشق خدارا دیکھ کہیں ، وہ شوخ حزیں بدنام نہ ہو <br />وہ ماہ لقا بدنام نہ ہو، وہ زہرہ جبیں بدنام نہ ہو <br />ناموس کا اس کے پاس رہے، وہ پردہ نشیں بدنام نہ ہو <br />اس پردہ نشیں کو یاد نہ کر <br />اے عشق ہمیں برباد نہ کر <br /> <br />امید کی جھوٹی جنت کے، رہ رہ کے نہ دکھلا خواب ہمیں <br />آئندہ کی فرضی عشرت کے، وعدوں سے نہ کر بیتاب ہمیں <br />کہتا ہے زمانہ جس کو خوشی ، آتی ہے نظر کمیاب ہمیں <br />چھوڑ ایسی خوشی کویادنہ کر <br />اے عشق ہمیں برباد نہ کر <br /> <br />کیا سمجھےتھےاور تو کیا نکلا، یہ سوچ کے ہی حیران ہیں ہم <br />ہے پہلے پہل کا تجربہ اور کم عمر ہیں ہم، انجان ہیں ہم <br />اے عشق ! خدارا رحم و کرم! معصوم ہیں ہم، نادان ہیں ہم <br />نادان ہیں ہم، ناشاد نہ کر <br />اے عشق ہمیں برباد نہ کر <br /> <br />وہ راز ہے یہ غم آہ جسے، پا جائے کوئی تو خیر نہیں <br />آنکھوں سےجب آنسو بہتے ہیں، آجائے کوئی تو خیر نہیں <br />ظالم ہے یہ دنیا، دل کو یہاں، بھا جائے کوئی تو خیر نہیں <br />ہے ظلم مگر فریاد نہ کر <br />اے عشق ہمیں بر باد نہ کر <br /> <br />دو دن ہی میں عہدِ طفلی کے، معصوم زمانے بھول گئے <br />آنکھوں سےوہ خوشیاں مٹ سی گئیں، لب کووہ ترانےبھول گئے <br />ان پاک بہشتی خوابوں کے، دلچسپ فسانے بھول گئے <br />ان خوابوں سے یوں آزادنہ کر <br />اے عشق ہمیں برباد نہ کر <br /> <br />اُس جانِ حیا کا بس نہیں کچھ، بے بس ہے پرائے بس میں ہے <br />بے درد دلوں کو کیا ہے خبر، جو پیار یہاں آپس میں ہے <br />ہے بے بسی زہر اور پیار ہے رس، یہ زہر چھپا اس رس میں ہے <br />کہتی ہے حیا فریاد نہ کر <br />اے عشق ہمیں برباد نہ کر <br /> <br />آنکھوں کو یہ کیا آزار ہوا ، ہر جذبِ نہاں پر رو دینا <br />آہنگِ طرب پر جھک جانا، آوازِ فغاں پر رو دینا <br />بربط کی صدا پر رو دینا، مطرب کے بیاں پر رو دینا <br />احساس کو غم بنیاد نہ کر <br />اے عشق ہمیں برباد نہ کر <br /> <br />ہر دم ابدی راحت کا سماں دکھلا کے ہمیں دلگیر نہ کر <br />للہ حبابِ آب رواں پر نقشِ بقا تحریر نہ کر <br />مایوسی کے رمتے بادل پر امید کے گھر تعمیر نہ کر <br />تعمیر نہ کر، آباد نہ کر <br />اے عشق ہمیں بر باد نہ کر
