ظلم پھر ظلم ہے ‘بڑھتا ہے تو مٹ جاتا ہے خون پھر خون ہے ‘ٹپکے گا تو جم جائے گا

ظلم پھر ظلم ہے ‘بڑھتا ہے تو مٹ جاتا ہے <br />خون پھر خون ہے ‘ٹپکے گا تو جم جائے گا ۔ <br />خاکِ صحرا پہ جمے یا کفِ قاتل پہ جمے <br />فرقِ انصاف پہ یاپائے سلاسل پہ جمے <br />تیغِ بیداد پہ یا لاشہء بسمل پہ جمے <br />خون پھر خون ہے ٹپکے گا تو جم جائے گا ۔ <br />لاکھ بیٹھے کوئی چھپ چھپ کے کمیں گاہوں میں <br />خون خود دیتاہے جلادوں کے مسکن کا سراغ <br />سازشیں لاکھ اڑاتی رہیں ظلمت کا نقاب <br />لے کے ہر بوند نکلتی ہے ہتھیلی پہ چراغ ۔ <br />ظلم کی قسمتِ ناکارہ و رسواسے کہو <br />جبر کی حکمتِ پرکارکے ایماسے کہو <br />مہملِ مجلسِ اقوام کی لیلیٰ سے کہو <br />خون دیوانہ ہے ‘ دامن پہ لپک سکتا ہے <br />شعلہء تند ہے ‘خرمن پہ لپک سکتا ہے ۔ <br />تم نے جس خون کو مقتل میں دبانا چاہا <br />آج وہ کوچہ و بازار میں آنکلا ہے <br />کہیں شعلہ کہیں نعرہ کہیں پتھر بن کے <br />خون چلتا ہے تو رکتا نہیں سنگینوں سے <br />سر جو اٹھتا ہے تودبتا نہیں آئینوں سے ۔ <br />ظلم کی بات ہی کیا‘ ظلم کی اوقات ہی کیا <br />ظلم بس ظلم ہے ‘آغاز سے انجام تلک <br />خون پھر خون ہے سو شکل بدل سکتا ہے <br />ایسی شکلیں کہ مٹاؤ تو مٹائے نہ بنے <br />ایسے شعلے کہ بجھاؤ تو بجھائے نہ بجھے <br />ایسے نعرے کے دباؤ تو دبائے نہ بنے <br />خون پھر خون ہے سو شکل بدل سکتا ہے <br />ایسی شکلیں کہ مٹاؤ تو مٹائے نہ بنے