کلامِ فیض احمد فیض بہ زبانِ فیض احمد فیض <br />اس وقت تو یُوں لگتا ہے <br />اس وقت تو یوں لگتا ہے اب کچھ بھی نہیں ہے <br />مہتاب نہ سورج، نہ اندھیرا نہ سویرا <br />آنکھوں کے دریچوں پہ کسی حسن کی چلمن <br />اور دل کی پناہوں میں کسی درد کا ڈیرا <br />ممکن ہے کوئی وہم تھا، ممکن ہے سنا ہو <br />گلیوں میں کسی چاپ کا اک آخری پھیرا <br />شاخوں میں خیالوں کے گھنے پیڑ کی شاید <br />اب آ کے کرے گا نہ کوئی خواب بسیرا <br />اک بَیر، نہ اک مہر، نہ اک ربط نہ رشتہ <br />تیرا کوئی اپنا، نہ پرایا کوئی میرا <br />مانا کہ یہ سنسان گھڑی سخت کڑی ہے <br />لیکن مرے دل یہ تو فقط اک ہی گھڑی ہے <br />ہمت کرو جینے کو تو اک عمر پڑی ہے <br />میو ہسپتال، لاہور <br />4، مارچ 82ء
