تُو جب میرے گھر آیا تھا <br />میں اِک سپنا دیکھ رھا تھا <br /> <br />تیرے گھر کے دروازے پر <br />سُورج ننگے پاؤں کھڑا تھا <br /> <br />کِتنی پیار بھری نرمی سے <br />تُونے دروازہ کھولا تھا <br /> <br />تیرے بالوں کی خوشبوسے <br />سارا آنگن مہک رھا تھا۔ <br /> <br />اِک رُخسار پہ زلف گری تھی <br />اِک رُخسار پہ چاند کِھلا تھا <br /> <br />ٹھوڑی کے جگمگ شیشے میں <br />ہونٹوں کا سایا پڑتا تھا <br /> <br />تیری پلکیں بوجھل سی تھیں <br />میں بھی تھک کر چُور ھُوا تھا. <br /> <br />تیری ھلال سی اُنگلی پکڑے <br />میں کوسوں پیدل چلتا تھا. <br /> <br />یُوں گزری وہ رات سفر کی <br />جیسے خوشبو کا جھونکا تھا. <br /> <br />تیری خموشی کی شہ پا کر <br />میں کتنی باتیں کرتا تھا <br /> <br />چاند کی دھیمی دھیمی ضَو میں <br />سانولا مکھڑا لَو دیتا تھا <br /> <br />تیری نیند بھی اُڑی اُڑی تھی <br />میں بھی کچھ کچھ جاگ رھا تھا <br /> <br />میرے ھاتھ بھی سُلگ رھے تھے <br />تیرا ماتھا بھی جلتا تھا <br /> <br />کھڑکی کے دھندلے شیشوں پر <br />دو چہروں کا عکس جما تھا۔ <br /> <br />تیرے شانوں پہ سر رکھ کر <br />میں سپنوں میں ڈوب گیا تھا <br /> <br />دھوپ کے لال ھرے ھونٹوں نے <br />تیرے بالوں کو چوما تھا <br /> <br />تیرے عکس کی حیرانی سے <br />بہتا چشمہ ٹہر گیا تھا۔ <br /> <br />یوں گزری وہ رات بھی جیسے <br />سپنے میں سپنا دیکھا تھا۔ <br /> <br />دو رُوحوں کا پیاسا بادل <br />گرج گرج کر برس رھا تھا <br /> <br />دیکھ کے تیرے دیس کی رچنا <br />میں نے سفر موقوف کیا تھا <br /> <br />ماتھے پر بوندوں کے موتی <br />آنکھوں میں کاجل ھنستا تھا۔ <br /> <br />جب تک تجھ کو نیند نہ آتی <br />میں تیرے پاس کھڑا رھتا تھا۔ <br /> <br />آنکھ کھلی تو تجھے نہ پا کر <br />میں کتنا بے چین ھوا تھا۔ <br /> <br />تجھ بن گھر کتنا سُونا تھا <br />دیواروں سے ڈرلگتا تھا. <br /> <br />تجھ کو جانے کی جلدی تھی <br />اور میں تجھ کو روک رھا تھا۔ <br /> <br />تیرے دھیان کی کشتی لے کر <br />میں نے دریا پار کیا تھا۔ <br /> <br />دو یادوں کا چڑھتا دریا <br />ایک ھی ساگر میں گرتا تھا <br /> <br />دل کی کہانی کہتے کہتے <br />رات کا آنچل بھیگ چلا تھا <br /> <br />پل پل کانٹا سا چبھتا تھا <br />یہ ملنا بھی کیا ملنا تھا۔ <br /> <br />کسی پرانے وھم نے شاید <br />تجھ کو پھر بے چین کیا تھا۔ <br /> <br />سوکھ گئی جب سکھ کی ڈالی <br />تنہائی کا پھول کھلا تھا۔ <br /> <br />تنہائی محراب عبادت <br />تنہائی ممبر کا دیا تھا۔ <br /> <br />وہ جنت میرے دل میں چھپی تھی <br />میں جسے باھر ڈھونڈ رھا تھا۔ <br /> <br />تنہائی میرے دل کی جنت <br />میں تنہا ھوں ، میں تنہا تھا۔ <br /> <br />رات گئے سویا تھا لیکن <br />تُجھ سے پہلے جاگ اُٹھا تھا <br /> <br />گئے دنوں کی خوشبو پا کر <br />میں دوبارہ جی اٹھا تھا۔ <br /> <br />صبح ھُوئی تو سب سے پہلے <br />میں نے تیرا مُنہ دیکھا تھا <br /> <br />کیسے کہوں روداد سفر کی ؟ <br />آگے موڑ جدائی کا تھا۔ <br /> <br />بُھولی نہیں وہ شامِ جُدائی <br />میں اُس روز بہت رویا تھا <br /> <br />یاد آئیں کچھ ایسی باتیں <br />میں جنہیں کب کا بُھول چکا تھا <br /> <br />دل کو یونہی اک رنج ھے ورنہ <br />میرا تیرا ساتھ ھی کیا تھا۔ <br /> <br />تُجھ بِن ساری عُمر گزاری <br />لوگ کہیں گے تُو میرا تھا. <br /> <br />تھوڑی دیر کو جی بہلا تھا <br />پھر تری یاد نے گھیر لیا تھا <br /> <br />تیرے ھاتھ کی چائے تو پی تھی <br />دل کا رنج تو ، دل میں رھا تھا <br /> <br />کس کس بات کو روؤں ناصر <br />اپنا لہنا ھی اتنا تھا۔ <br /> <br />”ناصر کاظمی“
