Fushata për zgjedhjet vendore të nesërme u mbyll mbrëmë, dhe nga mesnata, politika, institucionet e saj si dhe media, janë në heshtje zgjedhore. Megjithatë, sot, ashtu siç garanton kushtetuta, ushtruan të drejtën e votës të burgosurit në shtëpitë ndëshkuese dhe korrektuese, 1 mijë e 446 persona, si dhe votuan edhe 136 persona të cilët llogariten si persona të shpërngulur brenda vendit, si dhe persona në spitalet e vendit. Kryetari i kuvendit lokal zgjedhor në burgun e Idrizovës, Dragan Georgievski thotë se gjithçka votimi ka vijuar rregullisht dhe rezultatet do të dërgohen menjëherë pas numërimit nëpër të gjitha vendvotimet amë të tyre.<br /><br />"Është bërë lista adekuate sipas personave që vijnë nga këto komuna, d.m.th pas votimit me urgjencë do të transportohen nga vendet edhe nga vijnë", tha Dragan Georgievski -- kryetar i kuvendit zgjedhor.<br /><br />Drejtori i burgut të Idrizovës Zhivko Pejkovski thotë se nuk ndihet përgjegjës pse nga 1 mijë e 200 të burgosurit, të drejtë vote sot gëzuan vetëm 609 prej tyre.<br /><br />"Ne i kemi liruar të gjithë të burgosurit që ishin në listë zgjedhore, rreth 1200 të tillë, pa shtetasit e huaj këtu, deri tek Ministria e Drejtësisë dhe ajo i derivoi tek Komisioni Shtetëror Zgjedhor, dhe pse sot kanë pasur të drejt vote vetëm 609, tek ata do të drejtoheni", tha Zhivko Pejkovski -- drejtor i burgut të Idrizovës.<br /><br />Ndërkohë qytetarët të cilët kanë humbur ose nuk posedojnë letërnjoftim biometrik, mjeti i patjetërsueshëm për të ushtruar të drejtën e votës, nga MPB-ja informojnë se këta persona do të mund të pajisen me dokumente personale edhe gjatë ditës së sotme dhe të nesërme. Shërbimet juridike të MPB-së pranojnë kërkesat e qytetarëve nga ora 8 e 30 e mëngjesit deri në orën 16 e 30. Valmir Kuçi
