RDK-ja e Osmanit gjatë raundit të dytë zgjedhor që do të mbahet të dielën më 7 prill, në të gjitha komunat ku garojnë kandidatë shqiptarë, do të mbështesë kandidatët e PDSH-së. Kjo sipas nënkryetarit të RDK-së, njëkohësisht shefit të shtabit zgjedhor Artan Dika, vjen si kundërpërgjigje ndaj BDI-së. Sipas tij, partia shqiptare në pushtet manipuloi rëndë procesin zgjedhor të 24 marsit, duke minuar themelet e demokracisë dhe procesin e lirë zgjedhor.<br /><br />"Kryesia Qendrore e Rilindjes Demokratike Kombëtare, në mbledhjen e saj të mbajtur dje, më 2 prill 2013, pasi analizoi situatën aktuale politike në vend, vendosi që të mbështesë pa rezervë kandidatin shqiptar, zotin Ziadin Sela në raundin e dytë në komunën e Strugës, të cilin edhe në raundin e parë e ka favorizuar mos-nxjerrja e kandidatit për kryetar të komunës së Strugës nga ana e RDK-së, dhe të autorizojë Kryesitë e degëve të RDK-së që të zhvillojnë negociata për bashkëpunim potencial me kandidatët e partisë tjetër opozitare shqiptare, PDSH-së, në komunat në të cilat garojnë kandidatë shqiptarë në raundin e dytë dhe ku këshilltarët e RDK-së kanë rëndësi të veçantë për formimin e shumicës në këshillat komunal", tha Artan Dika, RDK.<br /><br />I menjëhershëm ishte edhe reagimi i BDI-së. Artan Grubi theksoi se BDI-ja nuk frikësohet aspak nga bashkëpunimi RDK-PDSH, sepse sipas tij, BDI-ja ka koalicion me popullin.<br /><br />"BDI-ja ka aleancë me qytetarët shqiptarë, dhe shqiptarët ja kanë dhënë besimin absolut në zgjedhjet e 24 marsit dhe ky besim do të përsëritet edhe në rrethin e dytë më 7 mars. Asnjë bashkëpunim jo-parimor, asnjë partneritet strategjik nuk do ta dëmtojë fitoren e shqiptarëve. Pritjet tona për qytetin e Tetovës dhe qytetin Gostivarit janë fitore absolute dhe e garantuar në të dy qytetet. Ne do të festojmë më 7 prill. Fitoren do e korrë BDI-ja, por do e shijojnë të gjithë qytetarët e Tetovës dhe Gostivarit", tha Artan Grubi, zëdhënës i BDI-së.<br /><br />Nga BDI, i kujtojnë kreut të RDK-së Rufi Osmani, deklaratat e dhëna në Alsat në emisionin 'Rruga Drejt...' se në qoftë se gjatë zgjedhjeve nuk merr 30 mijë vota do të tërhiqet nga skena politike.<br /><br />"Para zgjedhjeve të 24 marsit, Rufi Osmani doli me prognozë që do të fitojë që në rrethin e parë, por e humbi atë dhe BDI prin në Gostivar me 11.208 vota kundër RDK që ka 10.775 vota. Ndërsa në nivel republikan, partia e Rufi Osmani ka 28. 369 kurse Bashkimi Demokratik për Integrim ka 134.690 vota. Në TV kombëtar Alsat-M në emisionin Rruga Drejt.. më 8 dhjetorë 2011, Rufi Osmani publikisht u dha fjalën shqiptarëve dhe u zotua se po që se nuk i merë më tepër se 30 mijë vota në këto zgjedhje ai do të tërhiqet përgjithmonë ë nga politika", u shpreh Artan Grubi, zëdhënës i BDI-së.<br /><br />Përplasjet politike janë intensifikuar më tej mes subjekteve politike, me afrimin e datës së mbajtjes së zgjedhjeve, në kuadër të raundit të dytë. Bedri Rexhallari
