Kryetari i RDK-së Rufi Osmani ka akuzuar sot kryetarin e Komunës së Gostivarit Nevzat Bejtën për 'revanshizëm politik", për shkak të largimit nga puna të afro 200 personave nga Ndërmarrja Publike Komunale dhe Shkollat Fillore dhe të Mesme. Sipas Osmanit, vetëm në Ndërmarrjen Komunale të Gostivarit janë larguar afër 160 persona dhe 18 të tjerë nga Komuna e Gostivarit.<br /><br />"Më datë 17.04.2013, ua ndërpreu kontratën e punës të cilët kishin marrëdhënie pune deri më 30.06.2013, pa asnjë arsyetim juridik. Drejtori i përkohshëm i NPK Memedali Xhaferi, ditën e parë të punës urdhëroi verbalisht të ndërpritet marrëdhënia e punës për 166 punëtorë me kontratë në vepër, pa kurrfarë arsyetimi dhe justifikimi ligjor. Nevzat Bejta urdhëron drejtorët shkollave fillore dhe të mesme që të ndërpresin procedurat e furnizimeve publike në shkolla, për ekskursione dhe fotografim të nxënësve përkundër faktit që këto çështje financohen nga prindërit e nxënësve", deklaroi Rufi Osmani, kryetar i RDK-së.<br /><br />Kreu i komunës së Gostivarit Nevzat Bejta ka hedhur poshtë të gjitha këto akuza, duke e quajtur Osmanin si të painformuar në këtë drejtim, sepse ai nuk ka bërë largime nga puna por ka plotësuar ato vende pune, personat e të cilave nuk kanë ardhur në punë që nga dita e marrjes së mandatit si kryetari aktual. Kurse, për sa iu përket ndërprerjes së furnizimeve publike nëpër shkolla siç është fotografimi dhe ekskursionet, Bejta ka sqaruar se vendimet për këto gjëra do të merren nga vetë nxënësit dhe jo sikurse deri tani nga drejtorët dhe profesorët.<br /><br />"Ai përsëri mashtron, sepse, nuk është larguar asnjë punëtor i cili është punësuar ashtu siç e kërkon ligji, por se kanë qenë me kontratë dhe vendim të qeverisë dhe afati iu ka përfunduar. Edhe punëtorët të cilët ai i ka punësuar për aktivitete politike, edhe atyre iu ka përfunduar kontrata dhe mund të them lirisht se asnjë punëtor nuk është larguar as nga NPK-ja as nga Komuna. Për fotografimin nuk vendos drejtori apo profesorët, vendosin nxënësit. Për ekskursionin nuk e organizon atë komuna e as drejtori i shkollës, por vetë nxënësit vendosin se kur dhe jo kur t'iu kujtohet disa profesorëve për interesa të vetë", tha Nevzat Bejta, kryetar i komunës së Gostivarit.<br /><br />Bejta është shprehur se së shpejti do të bëjë publike edhe shpenzimin e mbi 1 milion eurove, fonde të komunës, nga 1 janari i këtij viti deri më 15 prill, të cilat sipas tij, janë përdorur për fushatën parazgjedhore nga ish kryetari Osmani. Bashkim Sulejmani
