Marrëveshja Kosovë-Serbi duhet të shërbejë si model për zgjidhjen e kontestit të emrit me Greqinë edhe pse çdo vend dhe kontest ka specifikat e veta. Kështu theksoi zv/kryeministri për çështje evropiane Fatmir Besimi, i cili qasjen e Serbisë dhe Kosovës në këtë dialog e vlerësoi si të guximshme dhe shembull për Maqedoninë dhe Greqinë.<br /><br />"Marrëveshja e arritur mes Kosovës dhe Serbisë, është një hap i guximshëm për integrimet evropiane në gjithë rajonin dhe mund të jetë si shembull i mirë për të përcjell edhe në rastet tjera në rajon, por edhe në rastin e Maqedonisë dhe Greqisë, ashtu siç më herët bëri, Sllovenia me Kroacinë. Mirëpo duhet të kemi parasysh se çdo vend ka specifikat e veta, por si qasje gjithsesi se është një hap i guximshëm dhe shembull i cili duhet të përcillet edhe nga vendet e tjera të rajonit në emër të integrimeve evropiane", deklaroi Fatmir Besimi, zv/kryeministër për cështje evropiane.<br /><br />Sa i përket anashkalimit të Maqedoninë në Këshillin e Ministrave në Luksemburg, Besimi tha se një gjë e tillë ishte e pritshme dhe se gjërat po rrjedhin me dinamikën e parashikuar. Zv/kryeministri thekson se deri në qershor duhet të arrihet progres në reforma dhe në çështjen e emrit, me qëllim që rezultati i mbledhjes së ardhshme të Këshillit të Ministrave të jetë pozitiv.<br /><br />"Raporti tani është dorëzuar nga komisari Fyle dhe deri në qershor ne duhet të vazhdojmë me reformat dhe temat tjera siç janë raportet e mira ndër-fqinjësore dhe çështja e hapur me Greqinë për emrin që deri në qershor të tregohet progres edhe në këtë fushë dhe atëherë të ketë edhe më shumë material në qershor në Këshillin e Ministrave Evropian që të diskutohet. Sa i përket dinamikës ajo është ashtu siç është e paraparë", tha Fatmir Besimi, zv/kryeministër për cështje evropiane.<br /><br />Komentet e tilla Besimi i bëri pas konferencës "Ndërtimi i diturisë për BE", në të cilën mori pjesë edhe ambasadori britanik Kristofer Ivon. Gjatë fjalimit të tij në konferencë, Ivon porositi shoqërinë dhe autoritetet e Maqedonisë që në vend se të izolohen me çështje të brendshme, tu japin rëndësi edhe çështjeve rajonale dhe ndërkombëtare, për të cilat Maqedonia duhet të merr përgjegjësinë e njëjtë me anëtarët e tjerë të Bashkimit Evropian dhe NATO-s, menjëherë pas anëtarësimit të saj në këto organizata ndërkombëtare. Benjamin Arifi
