Skadon sot në mesnatë afati ligjor për dorëzimin e listës shumëemërore të kandidatëve për deputetë për zgjedhjet e 2013 në Komisionin Qendror të Zgjedhjeve. <br /><br />Negociatat në të dy kampet kanë vijuar deri në orët e vona dhe pritet të vijojnë edhe gjatë ditës së sotme. Listat pothuajse janë të mbyllura megjithatë pritet që dy partitë e mëdha PD e PS të mbledhin kryesinë për të vendosur përfundimisht emrat e 140 kandidatëve zyrtarë për deputetë. <br /><br />Mbledhja e kryesisë PS pritet të zhvillohen në orët e pasdites ndërsa PD gjatë mbrëmjes. <br /><br />Për herë të parë në listat e PS-së do të jetë kryetari i kësaj force Edi Rama, i cili udhëheq listën e kandidatëve në Vlorë, ndërsa në Tiranë do kryesojë Pandeli Majko, Kryetari i grupit parlamentar Gramoz Ruçi do të jetë në qarkun e Fierit. <br /><br />Para se të mblidhet kryesia e PS Rama doli në një konferencë për shtyp (13: 30) ku tha se se rikonfigurimi i skuadrës "ishte i domosdoshëm" dhe argumentoi pse kandidonte në Vlorë. Kreu i PS-së kërkoi të heqë çdo dyshim për Braçen duke konfirmuar se ai do të jetë në listat e kandidatëve por pa sqaruar se në cilin qark do të kandidojë. <br /><br />Burime nga PS konfirmuan se gjatë ditëve të fundit Rama ka patur takime intensive me deputetë aktualë, disa prej të cilëve nuk duket të jenë pjesë e listës së kandidatëve. Flitet se në lista nuk do të përfshihen Marko Bello, Arben Isaraj, Ilir Gjoni, Albert Çaçi.<br /><br />Ndërkohë në kampin blu, kryeministri Berisha ka vendosur të mos heqë dorë nga vendosja e emrit të tij në kandidatët për deputetë për kryeqytetin. Këtë vit vihet re kandidimi i një numri të madh ministrash e zëvendësministrash. <br /><br /><br />Në orën 12:00 të mesditës së sotme gazetari Arben Hasanaj i TV A1 Report i stacionuar në selinë PS informon se gjatë paradites së sotme janë parë të hyjnë deputetë si Arta Dade, Vasilika Leskaj, Mimi Kodheli, Bashkim Fino, si dhe Artan Lame e kreu i bashkisë Qazim Sejdini. Ndërkohë pritet të vijnë të gjithë anëtarët e kryesisë pasi pritet të nisë dhe mbledhja e kryesisë. <br /><br />Ndërkohë gazetarja Joniada Koçi e stacionuar në selinë PD thotë se nuk ka shumë lëvizje kjo pasi kryesia është caktuar të zhvillohet në mbrëmje.<br /><br />Ja listat që parashikojnë dy partitë, ndërsa zyrtaret pritet të shpallen sot.
