ELBASAN- Një grup qytetarësh i janë bashkuar shoqatës "Reago" në një protestë në qytetin e Elbasanit me moton "Stop ndotjes kancerogjene".<br /><br />Protestuesit janë mbledhur para uzinës së shoqërisë "Kurum", duke bllokuar hyrjen e mauneve në uzinë.<br /> <br />Niveli i lartë i ndotjes në këtë qytet, shkaktohet sidomos nga tymrat e emetuara në ambient nga fabrikat që ushtrojnë aktivitetin e tyre në zonën e ish-metalurgjikut.<br /><br />Sipas protestuesve në fabrikat e "Kurum" dhe "Ferrokrom", nuk janë vendosur filtrat e nevojshëm për mos emetimin e gazrave të dëmshëm në mjedis.<br /><br />Aktivistët e shoqatës "Reago" i bëjnë apel organeve shtetërore të ndërhyjnë duke mbrojtur të drejtat e qytetarëve, shëndetin e tyre, si dhe të respektohet mjedisi si përparësi kombëtare.<br /><br />Ata kanë bërë thirrje: "Respektoni ligjet ose përgjigjuni para tyre".<br /><br />"Statistikat që jepen nga organet shtetërore në lidhje me nivelin e ndotjes në Elbasan janë të dyshimta e të pavërteta. Realiteti është krejt i kundërt duke shënuar një ndotje të lartë në qytet dhe rrethinat e tij"- tha kryetari i organizatë Leonard Dedej, i tha korrespondentit tonë në Elbasan, Andi Qosja. <br /><br />Dedej theksoi faktin se organizata që ai drejton do të ndjekë në rrugë ligjore këtë çështje për të ulur sado pak fenomenin e ndotjes industriale në Elbasan.<br /><br />Sipas Dedej, "ndotja është kaq e lartë sepse nuk funksionon auditi nga Ministria e Mjedisit dhe duhet të ketë një vëmëndje më të madhe ndaj lëndëve kancerogjene që përhap në atmosferë Firma "Kurum" Dhe "Ferrokromi ACR".<br /><br />Problemi i ndotjes vazhdon ndër vite të jetë, shqetësimi kryesor i qytetarëve elbasanas dhe shkaku kryesor i kësaj situate është ndotja industriale. Ndotja mbi normat e lejuara nga BE ka rritur numrin e personave të prekur nga sëmundjet kancerogjene.<br /><br />Organizata "Reago", ka theksuar se, "krahas rrugëve ligjore që do të ndiqen nga juristët pranë kësaj organizate, do të vijojnë edhe protestat të cilat do të përshkallëzohen edhe më tej.<br /><br />Një ditë më parë, I ftuar në Tv "A1 Report", kreu i grupit "Ekolëvizja", Xhemal Mato, tha se kompanitë zgjedhin të mos vendosin filtrat pasi kanë kosto të mëdha, në dëm të shëndetit të qytetarëve.<br /> <br />Në qytetin e Elbasanit niveli i ndotjes është në shifra të larta, edhe pse së fundmi nuk janë bërë monitorime nga institucionet përgjegjëse për evidentimin e situates.
