TIRANË -- "Ilir Xhakja duhet të qëndrojë përjetë në burg". Kjo eshtë kërkesa e prokurorit të çështjes, në Krimet e Rënda, Eugen Beci, lexuar sot paradite në sallën e gjyqit, në procesin në ngarkim të të akuzuarit për vrasjen e komisarit të Shijakut, Adem Tahiraj.<br /><br />Në Gjykatën e Krimeve të Rënda u zhvillua seanca e radhës në ngarkim të fortit të Shijakut, ku përfaqësuesi i akuzës lexoi pretencën prej 13 faqesh.<br /><br />Prokurori ka kërkuar dënimin me burg të përjetshëm për Ilir Xhakjan, për vrasjen e kryekomisarit Adem Tahiraj, dhe 10 vjet burg për plagosjen e Lena Ndokajt. Prokuroria argumenton se Xhakja paraqet rrezikshmëri të lartë shoqërore prandaj duhet të jetë në burg përjetë.<br /><br />Në ato çfarë ka ofruar akuza para trupit gjykues të kryesuar nga Bardhyl Dhama dhe avokatit të të pandehurit, thuhet se, Ilir Xhakja e ka ditur që Tahiraj ishte oficer policie në momentin që e ka qëlluar, pasi viktima i ka pasur të gjitha shenjat dalluese. Mbi Xhakjen rëndojnë edhe akuzat e armëmbajtjes pa leje dhe plagosjes.<br /><br />I akuzuari nuk ndodhej në sallën e gjyqit, ndërkohë që konkluzionet e mbrojtjes do të lexohen në seancën e caktuar në datën 24 korrik.<br /><br />Adem Tahiraj u qëllua nga Agim Xhakja më 13 shtator 2012, kur komisari i Shijakut i kishte ndaluar nipin dhe po e shoqëronte për në komisariat, pasi drejtonte një makinë<br />pa dokumente. <br /><br />Ilir Xhakja ekzekutoi Tahirajn me breshëri automatiku rreth orës 18:00 të 13 shtatorit 2012 në vendin e quajtur Katund Sukth të Durrësit, gjatë një operacioni kontrolli për armëmbajtje pa leje.
