GREQI - Vritet nga policia Marian Kola, një nga të arratisurit e fundit të burgut të Trikallas në Greqi, në orët e para të mëngjesit të sotëm dhe ka shpëtuar bashkëpunëtori i tij, Ilir Kupa. Gjatë një shkëmbimi zjarri me policinë në fshatin Vrosina, Marian Kola u plagos në gjoks dhe humbi jetën nga plumbi që i preku organet vitale. Nesër në mëngjes atij do t'i bëhet ekspertiza në spitalin e Janinës. Atij iu gjet edhe një një qese me një pistoletë brenda, ushqime dhe revista.<br /><br />Lidhur me të burgosurin tjetër, Ilir Kupa, ai arriti t'i shpëtojë rrethimit, por policia gjykon se arrestimi i tij është çështje orësh. Në vendngjarje nuk ka gjurmë të gjakut të tij, ç'ka do të thotë se nuk është plagosur.<br /> <br />Përleshja e policisë me dy të burgosurit ka ndodhur pranë urës së lumit Kalama, në fshatin Vrosina në malet e Sulit, ku policia i ka ngushutuar atyre rrethimin për të mos u lejuar hyrjen në Shqipëri. Ata janë zbuluar nga kamerat termike të policisë, që kontrollonte zonën gjatë natës.<br /><br />Dy të burgosurit kanë vjedhur gjatë dy javëve të fundit, 3 makina dhe kanë tentuar të kalojnë kufirin për në Shqipëri. Por, gjatë tentativave të tyre, kanë pasur vështirësi derisa kanë rënë mbrëmjen e djeshme, në një pritë të policisë ku ka pasur shkëmbim të ashpër zjarri ndërmjet tyre. <br /><br />Si rrjedhojë e përplasjes, një polic është plagosur në këmbë ndërsa një tjetër është shtruar në spitalin e Janinës.
