Që nga dita e enjte, Shtëpia Qëndrore e Ushtrisë do të jetë zyrtarisht selia e re e Partisë Demokratike. Administrata e selisë blu do të nisë të zhvendoset gradualisht që të enjten në mëngjes. Ndërsa gjatë të mërkurës, Shtëpia Qëndrore e Ushtrisë është boshatisur dhe pritet që t'i kalojë në dorëzim Ministrisë së Brendshme, konkretisht, Komisionit të Pushtetit Vendor.<br /><br />Që në orët e para të mëngjesit, disa kamionë janë parkuar në oborrin e SHQUP-it, ndërsa administrata dhe forcat e ushtrisë kanë nisur mbushjen e tyre me materialet e zyrave. <br /><br />Dy kamionët e parë të ngarkuar janë larguar rreth mesditës, për t'i dërguar materialet në një vend që ende nuk është bërë publik, por ndoshta pranë komandës së Logjistikës, pranë Shkollës së Bashkuar. <br /><br />Ndërsa deri në fund të ditës, godina duhet të jetë e boshatisur. Ndërkohë, nga burime kofidenciale është mësuar, se zyrat e reja të Shtëpisë Qëndrore të Ushtrisë, do të jenë pranë Ministrisë së Jashtme, tek ish-Pallati i Oficerëve. <br /><br />Ai është rikonstruktuar me një fond prej 1 milionë eurosh të dhëna nga Ministria e Mbrojtjes dhe pas pak kohësh do të jetë në funksion të plotë. <br /><br />Shtëpia Qëndrore e Ushtrisë u shndërrua në Seli të Partisë Demokratike me një vendim qeverie që u mbajt i fshehtë, ndërsa më 15 gusht, këtë ndryshim pronësie, e firmosi dhe Presidenti i Republikës, Bujar Nishani. <br /><br />Reagimet ishin të menjëhershme, si nga mazhoranca e re, që pritet të marrë pushtetin në shtator, edhe nga ish-ushtarakët. Ndërsa ndryshimin e pronësisë së SHQUP-it e ka kundërshttuar hapur dhe Shefi i Shtabit të Forcave të Armatosura, Xhemal Gjunkshi, i cili nuk firmosi asnjëherë dokumentet e kërkuara.
