Formohet Grupi i Punës për Implementimin e Raportit të Komisionit Hetimor për ngjarjet e 24 dhjetorit. Ilija Dimovski dhe Bllagorodna Duliq nga VMRO-DPMNE, Cvetanka Ivanova dhe Igor Ivanovski nga LSDM janë anëtarët e grupit. Në të, partia shqiptare në pushtet do të përfaqësohet nga koordinatori i saj Nexhati Jakupi, ndërsa opozita shqiptare nuk mori pjesë në koordinimin e sotëm, duke paralajmëruar njëkohësisht bojkotimin e plotë të punës së këtij grupi. Opozita maqedonase shprehet se, nëse ekziston vullnet politik, Grupi i Punës do e përfundojë me sukses misionin e tij.<br /><br />"Në rast se ekziston vullnet politik, Grupi i Punues mund ta kryej punën e tij shumë shpejtë. E shihni që VMRO DPMNE-ja sërish delegon personat e njëjtë që morën pjesë në komisionin 'Ad Hoc. Të njëjtit ata që, në ditën e nënshkrimit nuk e njohën raportin dhe për të cilin, vënë cilësime të turpshme. Por ajo është VMRO-DPMNE-ja. Për implementimin e raportit duhet të marrin pjesë, ata që e quajtën atë letër tualeti. Ne, në atë grup pune nuk jemi për shkak të VMRO-DPMNE-së, por për shkak të qytetarëve dhe të demokracisë parlamentare", deklaroi Igor Ivanovski, LSDM.<br /> <br />"Në interes të integrimeve evropiane të Maqedonisë, të lihet anash 24 dhjetori, ashtu siç u sugjerua edhe nga eksperti i Bashkimit Evropian, të mos kthehemi prapa, por të gjithë, të punojmë bashkë për ardhmërinë e vendit. Presim që Grupi i Punës ta kryejë shpejt punën e tij...Nga ana e shumicës parlamentare, posaçërisht nga ana e VMRO DPMNE-së, mund të them se ne jemi të gatshëm që rekomandimet e raportit, t'i përmbushim për arritjen e një konsensusi maksimal të mundshëm", tha Silvana Boneva, VMRO DPMNE.<br /><br />Nga BDI-ja ndërkohë, mirëpresin ndryshimin e rregullores dhe ligjit të Kuvendit, rekomanduar në të njëjtin raport. PDSH-ja nga ana tjetër, thotë se gjithë çështja e komisionit hetimor është farsë. Krizat e vërteta janë ato që prekin shqiptarët.<br /><br />"Ky grup pune sipas rekomandimeve duhet të punoj në ndryshimin dhe plotësimin e ligjit për kuvend si dhe ndryshimin dhe plotësimin e rregullores së punës së Kuvendit si dhe sugjerimeve dhe rekomandimeve tjera që kanë të bëjnë me punën parlamentare. Qëndrim i ynë është se këto dy dokumente janë me rëndësi të jashtëzakonshme, jetike për punën parlamentare dhe ne do të japim maksimumi tonë", deklaroi Nexhati Jakupi, BDI.<br /><br />"Vlerësojmë se kjo është një farsë politike, pasi problem real në Maqedoni nuk janë problemet që ndërmjet veti i kanë maqedonasit, por problem ndërmjet maqedonasve dhe shqiptarëve, këto janë problemet të cilat kërkojnë zgjidhje. Janë çështjet me interes të shqiptarëve. Askund këtu nuk përmendet çështja e përdorimit të gjuhës shqipe, e cila këtu në parlament nuk është gjuhë zyrtare", tha Imer Aliu, PDSH.<br /><br />Nga epilogu i punës së Grupit të sapo krijuar, do të varet edhe fakti nëse Maqedonia do të marrë apo jo raport pozitiv nga Komisioni Evropian. Bedri Rexhallari
