Vendimi i Komunës së Likovës që të shuaj disa paralele në gjuhën shqipe në disa shkolla periferike si rezultat i numrit të vogël të nxënësve ka bërë që sot mësuesit e shkollave në fshatrat malore Llukarë dhe Goshincë të fillojnë bojkotimin e procesit mësimor. Ata thonë se janë të vetëdijshëm për numrin e vogël të nxënësve, por, njëherësh janë edhe të shqetësuar për cilësinë e procesit edukativo arsimor pasi me kombinimin e paraleleve nxënësve të këtyre trevave u cenohet e drejta që një orë mësimi të zgjatë 40 minuta.<br /><br />"Fatkeqësisht po e them se ky është një hap jo i mirë se është edhe fillimi i vitit të ri shkollor, ne duhet të jemi pranë nxënësve, mirëpo këtu ndodhi ajo që ndodhi, javën e kaluar na njoftoi drejtori i shkollës se në shkollat periferike në Goshincë dhe Llukarë do të bëhet kombinimi i klasave të larta, kombinimi që cenon të drejtën e nxënësve, kombinim ky që nuk e kemi parë të arsyeshëm, pasi do të kombinohen klasa e gjashtë me klasën e tetë, dhe klasa e shtatë me klasën tetë nëntëvjeçare dhe sipas nesh me këtë kombinim si pikë e parë cenohet e drejta e nxënësit që shfrytëzimi i orës 40 minuta zbritet në 20 minuta", tha Hajriz Mustafa, përgjegjës i SH.F 'Dituria', fshati Llukare, Komuna e Likovës.<br /><br />"Më vjen keq që tani kanë mbetur këto punë të kryhen, sipas mendimit tim këto gjëra është dashur të përfundojnë në fund të vitit të kaluar shkollor që tani këtë fillim vit të jemi të gatshëm edhe ne punëtorët e arsimit të kryejmë obligimet tona, gjithashtu edhe nxënësit të jenë mësim e jo rrugëve. Kisha lutur organet e larta shtetërore, qeveritare që të zgjidhin këtë problem sa më shpejt me qëllim që të mos humbin as nxënësit por edhe ne mësuesit", u shpreh Rami Sinani, përgjegjës i SH.F 'Dituria', fshati Goshincë, Komuna e Likovës.<br /><br />Mësuesit e shkollave në Llukare dhe Goshincë kërkojnë që Komuna të respektojë vendimin e një viti më parë që reduktimi i paraleleve të bëhet gradualisht dhe vetëm pas shkuarjes në pension të mësuesve të vjetër të cilët janë në numër në këtë rajon.<br /> <br />"Ne nuk do të pranojmë këtë, pranojmë vetëm vendimin e këshillit të komunës që vitin e kaluar është miratuar, të zbutet situata me numrin e madh të arsimtarëve dhe ulja e këtij numri të kryhet në bazë të pensionimit", tha Hajriz Mustafa -- përgjegjës i SH.F 'Dituria', fshati Llukare,Komuna e Likovës<br /><br />Ndërkohë nga Komuna e Likovës mbeten në qëndrimin e një dite më pare. Nga atje thonë se mbyllja e këtyre paraleleve vjen si rezultat i numrit të vogël të nxënësve dhe pikërisht kjo është arsyeja pse janë kombinuar disa paralele. Në shkollat periferike të fshatrave malore Llukarë dhe Goshincë të Komunës së Likovës procesin edukativo arsimor e ndjekin rreth 75 nxënës. Fshatrat e lartpërmendur gjenden rreth 30 kilometra larg Komunës së Likovës dhe në to që jetojnë diku mbi 300 banorë. Autoritetet komunale thonë se numri i nxënësve në këto treva për çdo vit po bie dhe ata këtë fenomen e shohin tek ulja e natalitetit dhe largimi i banorëve drejt shteteve perëndimore. ...
