PRISHTINE- Kosova nga e hëna ka nisur të mos lejojë produktet e prodhuara në Maqedoni të hyjnë në territorin e saj.<br /><br />Urdhri i dhënë nga ministrja e Tregtisë dhe Industrisë në qeverinë e Kosovës, Mimoza Kusari-Lila të dielën pasdite për ndalimin e hyrjes së çdo malli të prodhuar në Maqedoni, është përcjellë menjëherë edhe në terren. Zyrtarët doganorë nga mesnata kanë nisur së zbatuari sanksionet e reja.<br /><br />"Radio Evropa e Lirë" ishte e pranishme në mesnatë në kufirin Kosovë-Maqedoni në Hanin e Elezit, për të vëzhguar nga afër vënien në praktikë e urdhërit për ndalimin e produkteve maqedonase.<br /><br />Dy kamionë që transportonin gypa të prodhuar në një fabrikë në Gjevgjeli, ishin të parët që u përballën me praktikat e reja kufitare.<br /><br />Ata u detyruan të ktheheshin prapa nga terminali doganor në Han të Elezit për në terminalin maqedonas në Bllacë, pasi kishin arritur pak minuta pas hyrjes në fuqi të urdhëresës administrative.<br /><br />Doganierët e Kosovës ua shpjegonin transportuesve maqedonas që u ndalën në terminal, se rregullat e reja vlenin nga mesnata, dhe se duhej kthyer mallin prapa.<br /><br />Në korrik të vitit 2011, Kosova pati vendosur embargo për produkte të Serbisë, në kuadër të masave të reciprocitetit, që u nxitën pas bllokimit të mallërave kosovare për të kaluar në territorin e serb.<br /><br />Problemet mes Kosovës dhe Maqedonisë ndërkaq nisën pas një importi të kushtëzuar të miellit dhe grurit që Shkupi zyrtar ua vendosi prodhuesve kosovarë.<br /><br />Qeveria në Prishtinë miratoi kundër-masa, të cilat kushtëzonin importin e disa produkteve të qumështit që prodhohen në Maqedoni.<br /><br />E gjithë kjo "betejë" me dhe për tregtinë, çoi që të dielën kosovarët të ndeshen me kolona të stërgjata në kufijtë me Maqedoninë, pasi Shkupi ua ngriti një taksë rrugore.<br /><br />24 orë më parë, ishte pala maqedonase ajo që kishte nxjerr rregulla të reja për kosovarët, ku secili që hyntnë këtë territor duhet të paguajë 2 euro për veten dhe pasagjerët tjerë, dhe 5 euro për makinën.<br /><br />Vendimi u pa si provokim nga Prishtina zyrtare, e cila nga e hëna bllokoi hyrjen e prodhimeve maqedone.<br /><br />Policët kufitarë të Kosovës thonë se kanë njoftuar jozyrtarisht kolegët e tyre kufitarë maqedonas për masat e reja dhe embargon e vendosur nga qeveria në Prishtinë për mallrat e prodhuara në Maqedoni.
