Derisa vazhdojnë bllokadat e rrugës drejt vendkalimit kufitar në Bllacë, pamundësia e kosovarëve për lëvizje me vetura shfrytëzohet për përfitime dhe biznese të ndryshme. Gjatë ditës së djeshme, veturat që kanë kaluar kufirin nga Kosova në Maqedoni janë dërguar nëpër një rrugë malore për të anashkaluar kamionët që vazhdojnë të bllokojnë rrugët. Sipas informatave të televizionit Alsat, këtë rrugë vozitësve ua ka rekomanduar pikërisht policia kufitare, në bashkëpunim me banorët e fshatit Bllacë, duke kërkuar nga 10 euro për çdo veturë.<br /><br />"Kjo është rruga nëpër mjet së cilës janë kaluar barrikadat para kufirit. Por sot, për shkak të motit të keq dhe kushteve të vështirësuara të kësaj rruge, është ndaluar qarkullimi në këtë anë".<br /><br />Rreziku nga moti i keq ka detyruar policinë që të bllokojë këtë kalim. Megjithatë kishte edhe të tillë që kërkonin alternativa të tjera për të anashkaluar bllokadat, por pa sukses.<br /><br />Bllokadat me kamionë nga të punësuarit në kompaninë "Makamtrans" po vazhdojnë edhe më tej. Edhe pse sipas ligjit për tubim publik është e ndaluar protesta në rrugë magjistrale dhe autostrada, përfaqësuesit e kompanisë Makamtrans vazhdojnë të këmbëngulin se protesta e tyre është në pajtim me ligjin dhe se rruga drejt vendkalimit kufitar në Bllacë nuk është rrugë magjistrale por rajonale.<br /><br />"Nuk do të thosha se është magjistrale. Nuk do të thosha. Kjo rrugë nuk është magjistrale, e as autostradë. Protesta është paralajmëruar me rregull. Nuk është as magjistrale as autostradë, kjo është rrugë rajonale", tha Biljana Muratovska, Makamtrans.<br /><br />Por, këtë e demanton drejtori i Drejtorisë Publike "Makedonija Pat" Gajur Kadriu.<br /><br />"Ajo është rrugë magjistrale dhe njihet me nomenklaturën A4, me nomenklaturën më të re për rrugët. Magjistrale është, fillon prej Stenkovecit deri në pikën kufitare Bllacë", deklaroi Gajur Kadriu, drejtor i "Makedonija Pat".<br /><br />Ndërkohë, nga Ministria e Punëve të Brendshme pranojnë se protesta është e jashtëligjshme, por thonë se nuk kanë ndërmend të reagojnë dhe të heqin bllokadat.<br /><br />"MPB-ja nuk mund të uzurpojë të drejtat e njeriut për tubime publike. Tubime publike nuk lejohen as para shkollave e çerdheve, por e dini se edhe për rastin Monstra kishte protesta nëpër qytet edhe para spitaleve edhe para çerdheve, kështu që nuk është hera e parë. Mendojmë se nuk ka nevojë për largim të dhunshëm të protestuesve sepse ata thonë që në momentin që do të hiqet bllokada nga ana e Kosovës ata do të ndërpresin protestën pa dhunë", u shpreh Ivo Kotevski, zëdhënës i MPB-së.<br /><br />Numri i qytetarëve të Kosovës që vizitojnë Maqedoninë ka rënë dukshëm pas vendosjes së taksave, ndërsa arrin minimumin që pas bllokimit të rrugës në kufi. Nga Doganat e Maqedonisë thonë se pas vendosjes së taksave në Maqedoni kanë hyrë 6 mijë qytetar, mbi 1 mijë vetura dhe rreth 30 autobusë dhe kamionë, shifër kjo që është shumë më e ulët në krahasim me të kaluarën. Benjamin Arifi
