VMRO DPMNE-ja edhe sot ka vazhduar me publikimin e dokumenteve të furnizimeve publike në Strumicë, me të cilat akuzojnë për nepotizëm kryetarin e kësaj Komune dhe liderin e LSDM-së Zoran Zaev. VMRO DPMNE akuzoi sot se kompania 'Javor Shped', partner i së cilës është vëllai i Zaevit gjatë viteve 2010 dhe 2011 ka marrë edhe dy tenderë të tjerë, në vlerë prej 28 dhe 14 milion denarë.<br /><br />"Kjo do të thotë se Zoran Zaev mikut të tij personal dhe partnerit të vëllait të tij Vice Zaev, i ka dhënë shuma milionëshe nga paratë e qytetarëve të Komunës Strumicë, njëjtë siç shpërndante më parë tenderë kompanive ta babait të tij, xhaxhait, kunatës, kushërirës dhe rejës", tha Dime Spasov, VMRO-DPMNE.<br /><br />LSDM-ja është përgjigjur se në Strumicë tenderët shpërndahen në bazë të procedurës ligjore, duke përmendur shembullin e kompanisë së kandidatit të VMRO-së për kryetar të Komunës së Strumicës, dhe deputetit aktual të partisë në pushtet, Vasill Pishev.<br /><br />"Në Strumicë, ku kryetar është Zoran Zaevi, tenderët fitohen me procedurë ligjore, dhe i fitojnë ato kompani që kanë ofruar kushte më të ulëta në treg, siç konfirmoi edhe kompania "AL -- MAKS", në pronësi të Vasill Pishev, deputet aktual i VMRO DPMNE-së dhe kandidat për kryetar të Strumicës në zgjedhjet e fundit lokale", thuhet në reagimin e LSDM-së.<br /><br />LSDM-ja opozitare akuzoi përsëri ministren e brendshme Gordana Jankullovska, se prej ardhjes në atë post, pasuria e saj kapitale është rritur jashtëzakonisht, gjë që sipas LSDM-së e vërteton edhe lista e pronësisë që vetë Jankullovska e ka dorëzuar në Komisionin për Antikorrupsion. Benjamin Arifi
