Presidenti Barack Obama, ka telefonuar presidentin francez Francois Hollande, duke siguruar një miqësi të plotë edhe pas tensionit të krijuar, për shkak të programit të përgjimeve, nga ana e Agjencisë amerikane për Sigurinë Kombëtare, NSA.<br /><br />Kjo është ajo çka bëhet e ditur nga Shtëpia e Bardhë, ku presidenti amerikan Obama, ka qartësuar faktin, se Shtetet e Bashkuara të Amerikës kanë filluar të rishohin mënyrën e mbledhjes së informacioneve, në mënyrë që të bilancojnë preokupimet e sigurisë së qytetarëve dhe aleatëve, me preokupimet për privatësinë, që mund të kalohet tek të gjithë.<br /><br />Ndërsa, gjatë vizitës së tij, në Francë, Sekretari i Shtetit Amerikan John Kerry, në një takim me ministrin e Jashtëm Fabius, nuk ka dashur të komentojë rreth kësaj çështje.<br /><br />E gjithë kjo përplasje mes Francës dhe Shteteve të Bashkuara të Amerikës, ndodhi ditën e hënë, kur e përditshmja franceze "Le Monde", duke cituar dokumente të ish-konsulentit të Agjencisë Amerikane Edward Snowden, kanë publikuar lajmin se Agjencia amerikane për Sigurinë Kombëtare NSA, ka përgjuar masivisht 70 milionë komunikacione telefonike të qytetarëve francezë, në një muaj.
