Presidenti Gjorge Ivanov nuk ka dijeni për deklaratat e Ali Ahmetit, përfshirë edhe atë për mos gëzimin e mbështetjes së BDI-së nëse ai do të ri-konkurronte si kandidat për president në zgjedhjet e ardhshme presidenciale. Ivanov theksoi se ende nuk ka arritur në një vendim mbi të ardhmen e tij në këtë garë të mundshme, por garantoi se në momentin e duhur, do të njoftojë edhe opinionin publik.<br /><br />"Kur do të vij moment do t'ua kumtojë vendimin qytetarëve... Nuk e di atë deklaratë", tha Gjorge Ivanov, president.<br /> <br />Duke komentuar edhe qëndrimin e Ahmetit, një ditë më parë, se emri mund të zgjidhet shumë shpejt, kreu i shtetit theksoi se gjithnjë ka qenë realist në këtë drejtim. Ai tha se mbështet plotësisht deklaratën e fundit të ndërmjetësit Metju Nimic, se të gjitha propozimet janë në tryezë dhe se problem kryesor mbetet përdorimi i emrit të ri.<br /><br />"Që kur kam ardhur në këtë funksion, asnjëherë nuk kam qenë pesimist dhe as optimist. Çdoherë kam qenë realist! Dhe nëse jemi realist, e dimë deklaratën e fundit të ndërmjetësit Nimic i cili është më i mirinformuar për procesin... ndaj nuk kam asgjë për të shtuar apo për të hequr nga deklarata e tij", u shpreh Gjorge Ivanov president.<br /><br />Sa i përket shfuqizimit të vendimit gjyqësor për Kezharovskin, presidenti Ivanov tha se do të veprojë në bazë të qëndrimeve që do të vijnë nga ministria e Drejtësisë. "Veprimi im do të bazohet edhe në vendimin që do të marrë komisioni që trajton këto çështje brenda presidencës, kuptohet nëse ka një iniciativë të tillë", theksoi Ivanov. Gjyltene Rexhallari
