Në Kosovë sot po zhvillohen zgjedhjet për pushtetin lokal, të parat zgjedhje ku përfshihen edhe komunat veriore të saj të banuara me shumicë serbe. Po votohet në 2 mijë në 38 komunat e Kosovës ndërsa të drejtën e votës mund ta shfrytëzojnë mbi një milion e 700 mijë qytetarë. Në këto zgjedhje konkurrojnë gjithsej 224 kandidatë për kryetarë komunash. Sipas sistemit zgjedhor, këtë post në rrethin e parë e fiton ai që siguron 50 për qind plus një vote. Nëse kjo nuk arrihet organizohet raundi i dytë ndërmjet dy kandidatëve që kanë fituar më së shumti vota. Mbi 7 mijë kandidatë konkurrojnë për vendet e këshilltarëve të kuvendeve komunale. Zgjedhjet e sotme lokale në Kosovë nga drejtuesit e partive politike janë vlerësuar nga si një test evropian dhe si një moment historik për shtetin që fitoi pavarësinë në 17 shkurt të vitit 2008.<br /><br />"Unë sa përmbusha detyrën time si qytetare. i bëj thirrje të gjithë qytetarëve të Kosovës që të marrin pjesë masivisht në këto votime, për të vendosur një standart të ri demokratik për vendin", tha Atifete Jahjaga, Presidente e Kosovës. <br /><br />"E shfrytëzova të drejtën e qytetarit, votova. I ftoj qytetarët e Prishtinës, qytetarët e Kosovës, të votojnë të gjithë. Me votë mundemi ta ndryshojmë gjendjen tonë për mirë dhe besoj që po e ndryshojmë për mirë dhe po vijnë ditë të mira në Kosovë", deklaroi Ramush Haradinaj, Kryetar i AAK-së. <br /><br />"Shpresoj dhe uroj që i gjithë procesi të shkoj mirë, pra të kemi zgjedhje të lira të ndershme dhe demokratike për shkak se në mandatin e ardhshme duhet të qeverisemi nga njerëz të lirë dhe të ndershëm që kanë legjitimitet demokratik. Nëse çka do, sadopak e ngjashme si në vitin 2010 ngjan atëherë shteti gjithnjë më i dobët i Kosovës, praktikisht e realisht po bëhet shtet i dështuar. Ne që ia duam të mirën Kosovës nuk e duam kurrsesi një gjë të tillë dhe po kujdesemi që të mos ndodh një gjë e tillë", tha Albin Kurti, Kryetar i Vetëvendosjes.<br /><br />Zgjedhjet e sotme po mbikëqyren nga më shumë se 30 mijë vëzhgues të vendit dhe ndërkombëtar ndërsa i gjithë procesi po ndihmohet nga Misioni i Organizatës për Siguri e Bashkëpunim në Evropë, kryesisht në pjesën veriore të banuar me shumicë serbe. Për mbarëvajtjen e procesit zgjedhor janë angazhuar mbi 5 mijë e 500 pjesëtarë të policisë së Kosovës. Alsat-M
