PDSH-ja opozitare edhe sot ka akuzuar Qeverinë e Maqedonisë, e në veçanti BDI-në, se po e zhvlerëson vizitën e kryeministrit shqiptarë Edi Rama në Maqedoni, duke mos vendosur flamuj të dyja shteteve nëpër rrugët e kryeqytetit dhe para institucioneve. Nga PDSH-ja thonë se flamuj nuk janë vendosur as para Kuvendit, në momentin e takimit të Ramës me kryeparlamentarin Veljanovski.<br /><br />"Sot gjendemi para Kuvendit të Maqedonisë, ku në këtë moment që flasim ne, zhvillohet takimi mes kryeministrit shqiptarë z. Edi Rama dhe kryetarit të Kuvendit. Asnjë flamur shqiptarë nëpër bulevardet e Shkupit, siç mund të shihni, asnjë flamur kombëtar para institucioneve shtetërore, ku kryeministri Rama zhvillon takimet bilaterale", tha Bekim Fazliu, PDSH.<br /><br />Ndërkohë nga Qeveria thonë se kryeministri Rama në Shkup është pritur me nderimet më të larta shtetërore, të parashikuara me protokoll me rastin e vizitave të burrështetasve të huaj.<br /><br />"Protokolli parasheh që flamuj shtetëror nëpër rrugë të vendohen vetëm atëherë kur për vizitë zyrtare në vend qëndron presidenti i shtetit. Kryeministri Rama është pritur me të gjitha nderimet e larta shtetërore, dhe sipas procedurave që parasheh protokolli diplomatik", thuhet në reagimin e Qeverisë.<br /><br />Kryeministri Edi Rama para qeverisë u prit në mënyrë solemne, me intonimin e himneve kombëtare të të dyja vendeve dhe rreshtimin e gardës kombëtare para Qeverisë së Maqedonisë. Benjamin Arifi
