Shqiptarët nuk janë të kualifikuar sa duhet, për menaxhimin e posteve udhëheqëse në Burgun e Shutkës. Kjo është arsyeja, sipas Ministrit të Drejtësisë Blerim Bexheti, pse në këtë burg nuk ka asnjë komandant policie, zv/komandant dhe as edukatorë shqiptarë. Sipas Bexhetit, përfaqësimi do të përmirësohet sapo të hiqen barrierat ligjore për avancim të kuadrove.<br /><br />"Ju kishit dje një informacion rreth përfaqësimit, që lartë poshtë, ai është! Por me miratimin e Ligjit për miratimin e sanksioneve nga ana e Parlamentit, jemi më se të sigurt sepse ky ka qenë edhe angazhimi ynë që pas abrogimit të këtyre neneve ne të bëjmë përmirësimin e gjendjes faktike. Për momentin, konform ligjeve pozitive, kuadrot shqiptarë që janë në burgun e Shkupit, nuk i plotësojnë kushtet për avancim. Por, me miratimin e Ligjit, dhe me shpërndarjen që do të bëhet nga Sekretariati i MO-së sigurisht se do të kihet parasysh që gjatë shpërndarjes të ketë edhe kuadro që i plotësojnë kushtet për vendet udhëheqëse", tha Blerim Bexheti, Ministër i Drejtësisë.<br /><br />Bexheti tha se për dallim nga Burgu i Shutkës, në Burgun e Idrizovës ka disa komandantë dhe zv/komandantë shqiptarë, edhe pse për të arritur përfaqësimin e drejtë dhe adekuat duhet të vazhdojë avancimi i kuadrove shqiptarë edhe në këtë burg.<br /><br />"Në burgun e Idrizovës e vërteta është se ka shqiptarë në vende udhëheqëse, edhe atë përveç zv/drejtorit ka zv/komandant në sektorin e sigurimit, komandant në hyrjen kryesore, komandant në hyrjen brenda në burg, udhëheqës sektori për risocializim, në pjesën e burgut të lirë ka përgjegjës edhe shqiptarë edhe maqedonas, dhe mendoj se duhet të vazhdojë edhe më tej ky ritëm", u shpreh Blerim Bexheti, Ministër i Drejtësisë.<br /><br />Ndërkohë në burgun e Shutkës, përveç mungesës së kuadrove në pozitat udhëheqëse, është në rënie edhe numri i policëve të thjeshtë shqiptarë. Në 4 vitet e fundit nga ky burg janë larguar 8 policë shqiptarë, ndërsa është pranuar vetëm një. Benjamin Arifi
