NJU JORK - Rrjeti më i madh social online Facebook ka njohur Kosovën si shtet të pavarur. Lajmi fillimisht u dha nga ministrja për Integrimet europiane e Kosovës, Vlora Çitaku, nëpërmjet rrjetit tjetër social Twitter.<br /> <br />Tashmë sa herë që përdoruesit e Facebook do të bëjnë "check in", pra të vendosin vendodhjen në faqen e tyre personale në FB, nuk do të dalë më Pristina, Serbia, por Pristina, Kosovo.<br /> <br />Pavarësisht se nuk bëhet fjalë për një njohje nga një shtet i botës, kjo njohje e Facebook ka një vlerë të jashtëzakonshme, sepse janë mbi 1 miliard njerëz në botë që përdorin rrjetin social.<br /> <br />Pak kohë më parë, kosovari Luard Kullolli i pati dërguar një peticion një prej themeluesve dhe shefit ekzekutiv të Facebook, Mark Zuckerberg, të cilit i kërkonte që FB të njohë Kosovën si shtet i pavarur. "Kosova nuk është Serbi, ajo është njohur nga më shumë se 100 shtete të botës. Ndaj shprehim keqardhje që në Facebook, vijon të figurojë si Kosovo, provincë serbe.<br /><br />Ashtu si të gjitha vendet e botës edhe shqiptarët e Kosovës kanë të drejtën të përfaqësohen në Facebook, si qytetarë të Kosovës", thuhej në peticionin e firmosur nga rreth 10 mijë qytetarë.<br /><br />Ndërkaq për këtë njohje ka kontribuar edhe përpjekja e programit Diplomacia dixhitale, që drejtohet zv/ministri i Jashtëm i Kosovës, Petrit Selimi, një prej njerëzve më aktivë në këtë drejtim.
