Bashkësia Islame e vlerëson të sajën truallin në Kala të Shkupit, pavarësisht se në ankand publik ky truall iu shit kompanisë së biznesmenit Kamçev dhe se Komisioni i shkallës së dytë ende nuk ka sjellë vendim. Sekretari i BFI-së Afrim Tahiri në emisionin "Rruga Drejt" u shpreh se trualli i dëshiruar në Kala kufizohet me pronën e myftinisë së Shkupit, dhe ai është i bindur se do të marrin edhe truallin kontestues.<br /><br />"Bashkësia Islame ka 3 vite që ka pronën e vet aty, e ka myftininë e Shkupit. Ka blerë një shtëpi, ka edhe vend dhe është gjendje faktike. Në vazhdimësi nga myftinia e Shkupit ajo pjesë do të bëhet pronë e BFI-së ngase edhe historikisht u ka takuar myslimanëve në të kaluarën. Nuk jemi larg asaj që protesta e BFI-së nuk do të jetë për truallin në Kala, sepse atë në njëfarë forme e konsiderojmë se është e jona, por do të jetë për Xhaminë Burmali", deklaroi Afrim Tahiri, sekretar i përgjithshëm i BFI-së.<br /><br />Edhe zv/kryeministri Xhaferi u shpreh optimist se ka akoma hapësirë dhe mundësi që të rregullohet kjo çështje dhe trualli në Kala ti jepet Bashkësisë Islame.<br /><br />"Nëse pyetem unë atëherë do të thosha po, ka hapësirë për tu përmirësuar gabimi. Për mendimin tim po, edhe në aspektin formal procedural, edhe në aspektet e tjera. Për arsye se në fund të fundit janë njerëzit ata që i rregullojnë çështjet", tha Musa Xhaferi, zv/ kryeministër.<br /><br />Sekretari i BFI-së nga ana tjetër theksoi se nëse toka e premtuar nuk i jepet BFI-së, dhe vazhdon diskriminimi ndaj Bashkësisë Islame, ata do të jenë të detyruar që drejtësinë ta kërkojnë përmes protestave në rrugë.<br /><br />"Sa i përket besimtarëve, imamëve, janë në vazhdimësi në kontakt me ne. Vetëm nesër në 650 xhamitë e Maqedonisë falin xhumanë 150 mijë burra, flas vetëm burra. Ata në çdo moment presin fjalën, urdhërin e Bashkësisë Islame për ta kërkuar të drejtën përmes protestës, edhe pse është një akt që ne më së pakti e dëshirojmë", u shpreh Afrim Tahiri, sekretar i përgjithshëm i BFI-së.<br /><br />Në emisionin e mbrëmshëm u fol edhe për mundësinë e rindërtimit të Burmali Xhamisë. Afrim Tahiri shpalosi një dokument të nënshkruar nga Musa Xhaferi me të cilin kishte kërkuar nga BFI-ja që të anulojë protestat e paralajmëruara për 15 mars të këtij viti, që kishin të bëjnë me rindërtimin e Burmali Xhamisë. Bashkësia Islame u shpreh e gatshme që të paguaj dyfishin e shumës investitorit grek i cili duhet të ndërtojë në vendin e Xhamisë Burmali. Tahiri u shpreh se si për Burmali Xhaminë, ashtu edhe për truallin në Kala, kreu i BFI-së Sulejman Rexhepi vazhdimisht zhvillon takime të drejtpërdrejta me kryeministrin Gruevski dhe ambasadorët e huaj në Maqedoni. Benjamin Arifi
