Një grup qytetarësh protestuan sot në Tetovë kundër ndotjes së ajrit. Në mënyrë demonstrative, ata kishin vendosur edhe maska kundërgazi. Organizatorët e kësaj proteste parashtruan kërkesa ndaj qeverisë dhe Ministrisë së Ekologjisë për përmirësimin e gjendjes, duke i kujtuar autoriteteve se çdo ditë që i shtohet kësaj situate, do të thotë shtim të sëmundjeve kancerogjene.<br /><br /> "Stop ndotjes kancerogjene të ambientit ku jetojmë! Ne duhet të reagojmë që të ndërpritet ky gjenocid ekologjik që po i ndodh Tetovës dhe rrethinës së saj, me qëllim që të afërmit tanë, familjarët dhe gjithë banorët e kësaj ane, të paktën të thithin ajër të pastër. Ky mision duhet të përmbushet patjetër, si parandalim i sëmundjeve kacerogjene", tha Xhelal Neziri, organizator i protestës.<br /><br />"Shpresoj që së paku masat që u përmendën, të merren parasysh dhe së paku të bëhet diçka që të gjithë ne që jetojmë këtu në Tetovë të kemi një ajër më të pastër, gjëja më elementare për jetë". <br /><br />"Unë kam dalë kundër ndotjes së ajrit sepse ne si studentë të rinj, në ardhmëri duam të kemi shëndet e jo sëmundje. Shteti duhet të na e sigurojë neve këtë, e jo të lërë fabrikat pa filtra".<br /><br />"Kemi dalë të protestojmë sepse Tetova nuk e meriton një gjendje të tillë. Mendoj që duhet të merren masa më konkrete që edhe qarkullimi rrugor të lirohet".<br /><br />Organizatorët e protestës kërkuan gjithashtu që inspektorët e ambientit të ndëshkojnë më ashpër ata që djegin lëndë toksik, apo çfarëdo lloj ndotësi tjetër të ajrit.<br /><br /> "Qeveria të urdhërojë Jugohromin dhe të gjithë ndotësit e tjerë të mëdhenj, të ndalin prodhimin deri në vendosjen e filtrave. Qeveria të subvencionojë me 30 % faturat e rrymës së amvisërive gjatë sezonit të ngrohjes, me qëllim të zvogëlimit të përdorimit të lëndëve djegëse si druve dhe qymyrit. Urgjentisht të zgjidhet çështja e pikave të paligjshme të grumbullimit të mbeturinave në rajonin e Pollogut", u shpreh Xhelal Neziri, organizator i protestës.<br /><br />Në qoftë se këto kërkesa nuk do të merren parasysh, organizatorët paralajmëruan se do të marrin masa më radikale protestuese. Ferikan Iljazi
