DURRËS - Vritet sot nga policia Gazmir Marku, autori i plagosjes së policit Agron Halilaj mbrëmjen e 28 dhjetorit në Durrës gjatë një aksioni policie.<br /><br />Vrasja e Markut ndodhi rreth orës 20:40 gjatë operacionit të dytë, që policia ndërmori për kapjen e tij, duke rrethuar lagjen Kënetë, ku Marku fshihej.<br /><br />Ky i fundit tentoi sërish të vriste një tjetër polic, për të çarë rrethimin e RENEA-s dhe forcave të policisë së komisariatit të Durrësit, që i bënë thirrje për t'u dorëzuar.<br /><br />Siç informoi korrespondenti i "A1 Report" nga Durrësi, Artur Korriku, që prej ditës së djeshme forcat e policisë intensifikuan përpjekjet për zbulimin e vendndodhjes së Markut.<br /><br />Vetëm sot në orë të vona ata zbuluan se ai gjendej në një banesë me numër 17/1 në lagjen Kënetë të Durrësit, jo larg banesës së tij.<br /><br />Gazmir Marku kishte zënë vend pas një pirgu dheu dhe kishte hapur zjarr duke tentuar të vriste një efektiv të policisë.<br /><br />Në këtë moment është hapur zjarr ndaj tij nga disa forca policie, duke bërë të mundur eliminimin e tij.<br /><br />Një ditë më parë, Gazmir Marku plagosi me automatik oficerin e Policisë Kriminale në Komisariatin e Policisë Durrës, efektivin, Agron Halilaj, i cili ishte pjesë e një patrulle, e cila kishte shkuar për të kontrolluar banesën e tij.<br /><br />Policia e Durrësit vuri në dispozicion edhe një shpërblim prej 5 mijë eurosh për arrestimin e Gazmir Markut.
