ATHINE- Në një kohë kur Greqia është në vështirësi ekonomike, marrja e presidencës së Bashkimit Europian do ta ndihmojë atë të dalë nga recesioni. Në ceremoninë zyrtare të marrjes së presidencës së BE-së, të zhvilluar në Athinë, Presidenti i Komisionit Europian, Hose Manuel Barroso, konfirmoi këtë fakt duke deklaruar se Greqia ka bërë progres dhe ka sjellë besimin tek vendet e tjera duke tërhequr investues të huaj.<br /> <br />"Greqia do të dalë nga recesioni këtë vit. Po përballemi me rimëkëmbjen ekonomike, në një kohë që papunësia qëndron në një nivel të pranueshëm. Situata është ende e brishtë, por duhet të përdorim vendosmërinë greke për të pranuar paketën fiskale, të miratojmë reformat e taksave dhe administratës publike. Ky është viti i parë i buxhetit europian që i hap rrugën investimeve".<br /> <br />Sipas Barrosos, kjo presidencë tregon se parashikimet ishin të gabuara dhe Greqia u tregua e aftë për të bërë përpjekje të konsiderueshme, ndërsa e vlerësoi gjithashtu si një mundësi që Greqia moderne të tregojë se mund të japë një kontribut të rëndësishëm për Bashkimin Europian.<br /> <br />Ndërsa gjatë fjalës së tij Kryeministri grek, Antonis Samaras theksoi se Europa e Bashkuar do të jetë zgjidhje për problemet që kaloi vendi i tij.
