TIRANE- Skema aktuale e pensioneve rezulton deficitare, në masën 42 miliardë lekë. Pikërisht për këtë arsye Ministria e Mirëqënies Sociale, nën varësinë e të cilës ka kaluar edhe Instituti i Sigurimeve Shoqërore, ka parashikuar ndryshime rrënjësore të skemës, duke futur pensionin social, dhe hequr tavanin për pensionin maksimal dhe pagat mbi 75 mijë lekë të reja në muaj.<br /> <br />Ministria e Mirëqenies Sociale zbardh për herë të parë piketat se si do të funksionojë skema e re e pensioneve. Ata shpjegojnë se skemë e re nuk prek ata që janë aktualisht në moshë pensioni, por do të hyjë në fuqi për ata që janë nën 40 vjeç.<br /> <br />Sipas Këshilltarit të ministrit Veliaj për Pensionet, Enkelejd Musabelliu, janë disa arsyet që e detyruan qeverinë të ndërmarrë një reformë të tillë rrënjësore në skemën e pensioneve.<br /> <br />Skema aktuale e pensioneve rezulton në masën defiçitare. Nëse për të mbuluar skemën e pensioneve duhet të kontribuojnë me siguracione 6 persona për një pensionist, aktualisht raporti është 1.1 kontribues për një përfitues. Më konkretisht ne kemi 640 mijë kontribues dhe 561 mijë përfitues.<br /> <br />Skema e re synon të vendosë një pension dysheme, që të sigurojë minimumin jetik, pavarësisht se sa është masa e kontributit, dhe të heqë tavanin për pagat mbi 75 mijë lekë të reja në muaj, duke u lënë mundësi atyre ta përcaktojnë vetë masën e pensionit që duan të përfitojnë.
