TIRANE- Dy javë nga sulmi kibernetik i e-maileve të qytetarëve të zakonshëm për kryeministrin Rama, i njëjti grup hakerësh godet sërisht. Këtë radhë është faqja zyrtare e Ministrisë së Drejtësisë ajo që është bërë pre e hakerimit. Bëhet fjalë për një sulm të ndodhur në regjistrin elektronik noterial, në shërbimin e provës dhe përmbarimit gjyqësor. Grupi shqiptar i hakerave, RedAnons_Al zotëron të dhënat e këtyre rubrikave në faqen www.justice.gov.al, dhe kërcënon se do të nisë t'i bëjë publike të dhënat që ka marrë, nëse qeveria shqiptare nuk plotëson kërkesat e tyre.<br /> <br />Hakerët kërkojnë hetimin e disa ish-zyrtarëve, ku një ndër ta është edhe , ish-sekretari i Përgjithshëm në Ministrinë e Ekonomisë Tregtisë dhe Energjetikës, Dardan Domi, i shkarkuar gjatë ditës së martë për abuzime me tenderat publike.<br /> <br />Grupi i hakerave i kërkon gjithashtu qeverisë që të mos ketë marrëveshje me Greqinë, sipas tyre në dëm të Shqipërisë dhe statusit të kandidatit, dhe të mos bëhen kërkime në ujërat shqiptare.<br /> <br />Të çohet deri në fund hetimi dhe procedimi penal ndaj ish-ministrit të Mbrojtjes Arben Imami, është një tjetër kërkesë që vjen prej grupit të hakerave.<br /> <br />Përveç grabitjes të parave të taksapaguesve shqiptarë, thonë hakerat, Imami nuk duhej të bëhej kurrë ministër. Këtë, hakerët e motivojnë me ngritjen e flamurit grek në Sarandë në vitin 1997, në vlerësimin e tyre, një gjest i turpshëm dhe skandaloz. Çështje të tjera që kërkohen të rishikohen, janë vendosja e gjobave nga policia rrugore, si dhe të hetohen rastet kur pedagogët marrin para në këmbim të notës.<br /> <br />RedAnons_Al, i vë ultimatum qeverisë që nëse nuk reagon brenda 90 ditëve ndaj kërkesave të tyre, do të fillojnë publikimin e komunikimeve të zyrtarëve të kësaj qeverie, duke përfunduar, sipas tyre, me një surprizë të pakëndshme për hapësirën kibernetike shtetërore.
